Polshadaǵy prezıdenttik saılaýǵa úmitkerler ishinde qazaq qyzy da bar. Ulty qazaq Balı Majes Polshadaǵy qazaqtar qaýymdastyǵyna basshylyq etedi. Mundaı aqparatty NewsBalt ınternet portaly taratty.

Balı Majestiń Polshadaǵy qazaq qaýymdastyǵyna basshylyq etip kele jatqanyna 12 jyl bolǵan. Ol adam quqyǵyn saqtaý jáne postkeńestik memleketterdegi demokratıalyq ózgerister máselesimen aınalysatyn kórinedi. Sondaı-aq Balı quqyǵy buzylǵandarǵa kómektesý arqyly qoǵamdyq isterge jıi aralasyp otyrady.

Árıne, onyń 100 myń qol jınaýǵa múmkindigi shekteýli, alaıda Balı óziniń prezıdenttik saılaý naýqanyna qatysý faktisi Polshadaǵy musylmandarǵa degen qarym-qatynastyń ózgerýine túrtki bolady dep úmittinedi.

"Men adam quqyǵy men azamattardyń bostandyǵy úshin kúresetin qarapaıym el turǵynymyn. Bul - ár eldiń demokratıalyq negizi. Eger qoǵamdyq ister tájirıbesi týraly aıtatyn bolsaq, ol asa mańyzdy. Men narazylyq tanytýshy shahterlermen de, fermerlermen de kezdesip, olardyń ókpe-nazyn tyńdadym. Bir polıseı joǵaltyp alǵan saqınasyn izdep 5 otbasy turatyn úıge tańǵy altyda eshqandaı eskertýsiz basa-kóktep kirgen jaǵdaıǵa da aralasqanmyn. Bul sońǵy aılardaǵy oqıǵalar ǵana. Kóptegen jyldary boıyna mundaı faktiler qatary da arta túsedi. Bul Polsha demokratıaly el bolsa da únemi quqyq buzýshylyqpen betpe-bet keletin, kúndelikti ómirde oryn alyp jatatyn el turǵyndarynyń quqyǵyna qatysty", - dep suhbat bergen atalǵan basylymǵa.

Balı Majes birneshe jyl buryn qazaqtar qaýymdastyǵynyń basshysy bop turǵanda Muhammed paıǵambardyń karıkatýrasy jarıalanymyna qarsy narazylyq bildirgen. Alaıda ol karıkatýraǵa qarsy oqpen nemese kúshpen jaýap bermeý kerektigin basa aıtqan.

Aıta ketelik, Polshadaǵy prezıdent saılaýyn ótkizý merzimi 2015 jyldyń 10 mamyryna belgilengen. Balı Majestiń týǵan kezdegi aty-jóni - Baljan Naýryzbaeva.

Ol Ońtústik Qazaqstan oblysy Shardara aýdanynda dúnıege kelgen. Mektepti támamdaǵan soń ol bilim izdep Máskeýge barady. Sol arada kúıeýge shyǵyp, Polshaǵa ketedi. Odan beri 20 jyldan astam ýaqyt ótken.