Astanada «Bolashaq mamandyqtary: Y, Z urpaqtary qandaı baǵytqa daıyn bolýy kerek?» taqyrybynda respýblıkalyq ǵylymı-praktıkalyq konferensıa ótti. Sharaǵa QR Din isteri jáne azamattyq qoǵam mınıstri Darhan Káletaev qatysyp, Prezıdenttiń Bes áleýmettik bastamasynyń jastar saıasaty máselelerin sheshýdegi mańyzyn atady.

Shara «Jastar» ǵylymı-zertteý ortalyǵynyń 5 jyldyǵyna oraı uıymdastyrylyp otyr. Ol 2013 jyly Elbasynyń Qazaqstan halqy Assambleıasynyń XIX sesıasynda bergen tapsyrmasyna sáıkes qurylǵan.

Konferensıanyń maqsaty - jastardyń ózekti máselelerin talqylaý, eńbek naryǵy júıesiniń aǵymdaǵy jaǵdaıyn baǵalaý, jastardy jumyspen qamtýdyń jańa nysandary men jastardyń rýhanı-adamgershilik ıdealdaryn boljap taldaý, sonymen qatar «Rýhanı jańǵyrý» baǵdarlamalyq maqalasy men Prezıdenttiń Bes áleýmettik bastamasyn iske asyrý perspektıvalaryn talqylaý bolyp tabylady.

Ǵylymı-praktıkalyq konferensıa jumysyna otandyq jáne sheteldik sarapshylar, memlekettik organdar men dıplomatıalyq qyzmet ókilderi qatysty.

Sharanyń ashylý rásiminde Darhan Káletaev QR Memlekettik hatshysy Gúlshara Ábdiqalyqovanyń «Jastar» ǵylymı-zertteý ortalyǵynyń 5 jyldyǵymen quttyqtaý hatyn oqyp berdi.

D. Kaletaev óz sózinde Qazaqstan Respýblıkasy Prezıdenti N.Á.Nazarbaevtyń Bes áleýmettik bastamasynda aıtylǵan memlekettik qoldaý sharalary negizinen jastardyń áleýmettik mártebesin kóterýge jáne jastardy alańdatatyn  máseleleri sheshýge baǵyttylǵan. 

Mınıstrdiń aıtýynsha, jastar úshin bilim alý, jumyspen qamtý jáne otbasyn qurý búgingi kún tártibindegi eń ózekti máseleler bolyp tabylady.

Sondaı-aq, konferensıa barysynda QR Bilim jáne ǵylym mınıstrliginiń jaýapty hatshysy Aryn Órsarıev, Almaty menedjment ýnıversıtetiniń prezıdenti Asylbek Qojahmetov, jastar saıasaty salasyndaǵy sarapshy Maria Cristina Bacalso baıandama jasady.

«Jańa mamandyqtar atlasy» jobasyn qurastyrýshy Dmıtrıı Sýdakov «Bolashaqtyń daǵdylary. Jańa álemde neni meńgerýimiz qajet?» atty baıandamasyn tanystyrdy. Onda XXI ǵasyrdyń bazalyq daǵdylary men jumyspen qamtýǵa yqpal etetin prosester týraly aıtyp ótti.

Konferensıa aıasynda «Jańa jumyspen qamtý nysandary jáne ozyq bilim berý», «Fýtýrologıa jáne bolashaq mamandar», «Zamanaýı álemde bilim berý: Y, Z urpaqtarynyń rýhanı-adamgershilik ıdealdary» atty seksıa jumystary ótkizildi. 

Konferensıa qorytyndysy boıynsha materıaldar jınaǵy shyǵarý jáne rezolúsıa qabyldaý josparlanyp otyr.

Murat Rahımjanov