Alashym, sen bıiksiń basqalardan, Tarıhyń tańbalanyp, tasta qalǵan. Qazaq degen birtutas el bolǵanyń, Kereı men Jánibekten bastaý alǵan. Shyndyǵyńdy jazaıyn Shynbolatsha, Qalamdy qolyma alyp jasqa malǵan. Tarıhyńnan bir úzik syr aıta alsam, Odan artyq mende joq basqa arman. Buryndyq pen aıbarly Qasym hanym, Basyna bult úıirgen basynǵannyń. Namysy nar atanǵa júk bolardaı, Taý tulǵaly týmasy ǵasyrlardyń. Ultaraqtaı jerimdi jaýǵa bermeı, Aspandy tilip túsken jasyndarym. Osyndaı oǵlandardy kóp týdyrǵan, Qazaǵym, altyn qursaq asyldarym. Mamash pen tekti týǵan Tahır hanym, Jer tósenish, aspan bop shatyrlaryń. Apaıtós alyp taýǵa uqsaǵansoń, Dushpanǵa tilengenin tatyrmadyń. Elime shapqanymen ala almapty, Ata jaýyń kóz súrter toqymdaı qum. Sender jaqqan erliktiń alaýymen, Máńgilik mazdap janar otyndaımyn. Buıdash pen Ahmetim, Toǵym hanym, Jaýlardyń jany ketken oǵyńda myń. Jaraly jolbarystaı jyrtyp ótken, Dushpannyń tuzaǵy men toryn, bárin. Osylaı bar qazaqtyń júreginen, Qaısar handar alypty oryndaryn. Ýa, babalar, ulylar bas ıemin, Joryqtarda ótkergen jolyńa myń. Óleńniń órnektesem kil paraǵyn, Tarıhtan sıa alsyn til qalamym. Eldep ótken Haqnazar, Shyǵaı hanym, Eńsesi Qarataýdaı tulǵalarym. At ústinde kún keship, jaýlarynyń, Óz basyna keltirgen shyrǵalańyn. Urpaǵyńnyń júregine nár berýde, Ar-namystan jaralǵan tunbalaryń. Babalar, bolmasamda suńǵyla aqyn, Jyrymnan óshirmeımin shyndyq atyn. Táúekel, Esim jáne Qasym hanym, Aıbyny jaýdyń saǵyn syndyratyn. Salmaǵyn kótere alar arǵymaǵy, Shapqanda tasty ýatyp, qum qylatyn. Arystandaı aqyrǵan handar barda, Qazaqty Qudaı ǵana qul qylatyn. Jánibek, Áz Táúke men Jáńgir hanym, Jyrǵa qosyp danqyńdy jańǵyrtamyn. Ulan-ǵaıyr jerimdi saqtaımyn dep, Ordasymen opyrǵan jaýdyń taǵyn. Elime kóz salǵandy qoısha qyryp, Soǵystarda keshkensiń qan burqaǵyn. Mamyrajaı tirlikte toı toılaýda, O, babalar senderdiń zańdy urpaǵyń. Shań baspaıtyn tarıhtyń tomdarynan, Oqımyn ónegeli tolǵan uran. Tapqyrlyq pen batyrlyqty uǵynyp ap, Jasyqtyqty kisendep orǵa jyǵam. Senderdiń tókken ter men qandaryńnan, Dala kúılep, taý aıtar tolǵanyp án. Tórt taraptan jaý tóngende, jeke-jeke, El úshin kúresińe aýdarylam. Jyrym shıki bolmasyn tolǵanystan, Shıki shyqsa janyma olda dushpan. Táýke han kóz jumǵanda, uly júzdi, Basqaryp, bolǵan eken Jolbarys han. Qaıyp han orta júzge han saılanǵan, Jyrymda bolǵan emes jalǵan ustam. Kishi júzge Ábilqaıyr han bolǵandy, Babalar ózektenip ór namystan. Bolat han, Sámeke men Ábilmámbet, Uǵamyn jandaryńdy jalynnan dep. Abylaı, Ýalı, Bókeı, Ǵubaıdýlla, Sender barda dushpan bop jabylǵan kóp. Alaıda elmen jerim shabylǵan joq, Ózge ultqa bas ıip baǵynǵam joq. Tarıh oqyp tanaýdan qan aqqanda, Namys ıisi ańqıdy qanymnan tek. Jolshybaı senderge de bir soǵaıyn, Tarıhpen jańǵyrtaıyn jyr saraıyn. Nuraly, Eraly, Esim, Aıshýaq han, Sendersiz tarıhymdy tul sanaımyn. Jantóre, Sherǵazy men Qarattaı han, Nesine shabytymdy tumshalaıyn, Aldaspan esimderiń saqtalardaı, Jyrymnan jarqyratyp qyn soǵaıyn. Handarym tur tektilik belesinde, Taý shydamas batyrlar jebesine. Tóle, Qazybek, Áıtekedeı bılerimiz, Jelken bolaǵan aqıqat kemesine. Buqar jyraý, Dospanbet, Shalkıizder, Óshpesteı qalyp qoıǵan el esinde. Máńgilikten bet aldyq Máńgilikke, Eı, ómir, biz sondaımyz kóresiń be?! Aıtyp bitpes handarym, batyrlarym, Jazýǵa jeter me eken aqyl daryn, Qarakereı Qabanbaı qaban syndy, Belgili dushpanyńa atylǵanyń, Qanjyǵaly Bógenbaı daýyl bolyp, Belgili qalmaq qolyn japyrǵanyń, Shapyrashty Naýryzbaı jaı otyndaı, Atajaý aspanynda shytyrladyń. Jalańtós, Bólek batyr, Raıymbek, Jyrdyń kóshin senderge buraıyn kep. Aıdynymyz turǵanda tunaıyn dep, Kelerin kim oılaǵan bulaı indet. Bes qarýdy asynyp attandyńdar, Jelikken jońǵarlardy qyraıyn dep. Árqaısyń ýyq bolyp qadaldyńdar, Shańyraǵym turǵanda qulaıyn dep. Er qazaqta batyrlar sapy qansha, Talaı jyl tarıhyńdy satylasam. Keshire kór qazaqtaı kemeńger el, Kóp tulǵany atamaı qapy qalsam. On azamat toǵyzy batyr bolsa, Jaýlardyń jasaqtary qaqyrar san. Erlik túgili esimińdi jazamyn dep, Jyrynda basalmaıdy aqyn alshań. Abylaı belgili ǵoı danqyń maǵan, Altyn sapty narkesken jaltyldaǵan. Tórt taraptan jaý tóngende orystarmen, Ymyraǵa kelýden tartynbaǵan. Amalsyz osy oıǵa keldi hanym, Qalsyn dep elim aman,ańqyldaǵan. Qalsyndep jerim aman, altyn dalam. Ańyraqaı, Aqtaban shubyryndy, Kelte ete almadyń ǵumyrymdy. Orbulaqta jaýymdy oıran etip, Han-Táńrige kótergen tuǵyrymdy. Eldigimniń jolynda talaı baba, Jaýyńa julyp berdiń julynyńdy. Sol erliktiń arqasynda dushpandardyń, Baıraǵy áli kúnge jyǵylýly. Talaı jaý jolǵa qurdy qurysh qaqpan, Sodan keıin jaıyń joq tynysh jatqan. Aǵylyp malyń ketti salyq bolyp, Arbalanyp aýǵan-dy yrys batpan. Orysqa basybaıly bolmaımyn dep, Batyr shyqty namysy tý ustatqan. Azattyqtyń jolynda han Keneniń, Ór basyn qaıqylanǵan qylysh shapqan. Asharshylyq, jutpenen soǵystarda, Tiktirmeı turyp edi qonysty alǵa. Myń ólip, myń tirilgen qaıran elim. Urpaǵyń jarap jatyr qol ustaýǵa. Álıhan, Ahmet pen Mirjaqyptar, Ámirin tyńdata alǵan orystarǵa. Sebebi tekti bolyp ósken olar. Eń birinshi qoıatyn namysty alǵa. Aqqulaqqa otar bop qamalǵanda, Shattyǵy qazaǵymnyń tonalǵanda. Azattyqtyń aq tańy atty jarqyn, Aq qardyń betin qyzyl qan alǵanda. Qaırat, Erbol, Bolattaı bozdaqtaryń, Ot quıdy sherge tolǵan janarlarǵa. Qazaqtyń sol kezdegi qurbandary, Jeltoqsanda atylǵan janartaý ma?! Jeltoqsanda shattyqqa tolǵan keýde, Jasandy taýym, tasym, orman, kól de. Máńgilik qazaq eli atandyń da, Salyndy Astanadaı ordań, tórge. Babalardyń qanymen kelgen baqty, Qazaǵym, endi máńgi qoldan berme! Asyl SULTANǴAZY – 1993 jyly týǵan, aqyn, oblystyq, respýblıkalyq jyr múshaırasynyń jeńimpazy, İ. Jansúgirov atyndaǵy Jetisý memlekettik ýnıversıtetiniń stýdenti. Taldyqorǵan qalasy.