Qyzylordada Nurjan Tólendıevten aýmaıtyn jas ártis turady.
Elimizge belgili óner adamyna syrt kelbeti aýmaıtyn azamattyń aty-jóni - Qaırat Ábjálıev. Ol 1993 jyly Qyzylordaǵa qarasty Tasbóget kentinde týǵan. Basylymǵa bergen suhbatynda jas ónerpaz Mánshúk Mámetova atyndaǵy Qyzylorda gýmanıtarlyq kolejinen akter mamandyǵy boıynsha bilim alǵanyn aıtty. Qazirgi ýaqytta ol Nartaı Bekejanov atyndaǵy qazaq mýzykalyq drama teatrynyń ártisi bolyp jumys isteıdi.
Qaırat Nurjan Tólendıevke jetinshi synypta oqyp júrgen kezinen beri eliktegen. "Alǵashynda onyń ázilderin kórip, keıin qaıtalap, bertin kele uqsaı bastadym. Uqsastyq dep otyrsyz, meniń sóıleý mánerim, túr-sıpatym uqsaıdy. Tipti, ony Nurjan aǵamyz da aıtty", - dedi ol. Sonymen qatar, ónerdegi aǵasy Qaırattyń ónerin tamashalap, jaqsy dep baǵalaǵannan keıin aǵalyq aqyl-keńesin de beripti.
"Parodıa jasaǵan ózime unaıdy, - deıdi Ábjálıev, - Aldymen Elbasymyzǵa, Ábsattar qajy Derbisálige, Imanǵalı Tasmaǵambetovke, óner ıeleri Ýálıbek Ábdiraıymovke, Nurjan Tólendıevke, ánshilerden Medeý Arynbaevqa, Meırambek Besbaevqa, Nurlan Espanovqa, Zattybek Kópbosynovqa, Qaırat Nurtas pen Qaırat Túntekovke, Syrym Isabaevqa jáne "Meniń atym Qoja" atty fılmdegi Qojaǵa parodıa jasaımyn. Al názik jandylardan Janar Aıjanovaǵa parodıa jasap júrmin".
Eske sala keteıik, buǵan deıin Qytaıdan belgili ánshi Meırambek Besbaevtyń "syńary" tabylǵany habarlanǵan edi. Daýysy da, túr-sıpaty da Meırambek Besbaevtan aýmaıtyn ánshiniń aty-jóni - Baqytkeldi Muqashuly. Ol da óner jolyn tańdap, ónerdegi aǵasynyń ánderin aınytpaı salady.
Pikir qaldyrý