Shymkentte 200 myń teńge úshin jas jolaýshy qyzdy tonap, qasaqana óltirip ketken taksı júrgizýshisi sottaldy, dep habarlaıdy Qamshy.kz aqparat agenttigi OQO-nyń Qylmystyq ister jónindegi mamandandyrylǵan aýdanaralyq sotyna silteme jasap.

Sottyń bergen málimetine súıensek, 26 jastaǵy taksıst 19 jylǵa bas bostandyǵynan aırylǵan. 

"Bul is sotqa QR Qylmystyq kodeksiniń 192-babynyń 2-bóligi 5-tarmaǵy jáne 99-babynyń 1-bóligi boıynsha tústi. Sot otyrysynda prokýror sottalýshyǵa jańa aıyp taqty. Nátıjesinde er adam QR Qylmystyq kodeksiniń 99-babynyń 2-bóligi 10-tarmaǵy boıynsha, ıaǵnı, basqa qylmysty jasyrý maqsatynda adam óltirgeni úshin sottaldy. Prokýror 18 jyl surady, alaıda sot jasalǵan qylmystyń aýyr bolǵanyn eskere otyryp, er adamdy 19 jylǵa sottady", - dedi sýdıa Samıddın Temirálıev.

İs materıaldaryna súıensek, sottalýshy bıylǵy jyldyń qańtarynda Áıgerim Tasbolatova esimdi 24 jastaǵy qyzdyń bar aqshasyn sypyryp alyp, artynsha soqqyǵa jyǵyp, óltirip ketken. 

Marqumnyń jaqyndary taksı júrgizýshisi qyzdyń bankomattan aqsha alǵanyn kórip, ańdyp, kóligine otyrǵyzyp, bul qylmysqa qasaqana barǵan dep boljap otyr. Qyzdyń máıiti eki aptaǵa deıin tabylmaǵan. 

Qaıtys bolǵan qyzdyń týystary sottyń shyǵarǵan úkimine narazy. Olardyń oıynsha qylmysker 25 jylǵa qamalýy tıis.