Almatyda 4 jasar ul bala joǵalyp ketti, — dep habarlaıdy Qamshy.kz aqparat agenttigi Almaty İİD baspasóz qyzmetine silteme jasap.
İİD málimetinshe, 2014 jyly týǵan Kómekov Arsen 17 mamyrda Almaty qalasy Alataý aýdanyndaǵy Shańyraq shaǵyn aýdanynda joǵalyp ketken. Ol kúnniń ekinshi jartysynda úı qorshaýynyń syrtynda eresekterdiń qaraýynsyz oınap júrip, belgisiz baǵytqa ketip qalǵan.
«Balanyń joǵalyp ketkenin onyń týystary túngi saǵat on shamasynda habarlady, olardyń óz betinshe izdegen jumystary nátıje bermegen. Qylmystyq polısıa, kámeletke tolmaǵandardyń isteri jónindegi ýchaskelik polısıa, ýchaskelik ınspektorlar, jol-patrýldik polısıa, arnaıy daıyndalǵan ıtterimen kınologtar jáne Ulttyq gvardıanyń áskerı qyzmetkerlerinen shuǵyl túrde izdeý toby quryldy. Bastapqyda olar 23 bolǵan, qazir top sany 34-ke jetti. Balany izdeýge jumyldyrylǵan polıseılerdiń sany júzden asady», — dep habarlady Almaty İİD resmı ókili, polısıa podpolkovnıgi Saltanat Ázirbek.
Onyń aıtýynsha, eń aldymen bala úshin qaýipti jerler tekserildi: káriz lúkteri, qudyqtar, aryqtar, kanaldar, transheıalar, toǵaılar men ózenderdiń mańy, toǵandar, ıesiz qalǵan úıler, shatyrlar jáne taǵy da basqa.
«26 600 úıdi aralap, 18 myń adamnan suraldy. Bir áıel sol kúni keshki saǵat 20.00 shamasynda dúkenniń janynda jylap turǵan balany kórgenin biraq, nege ekeni, nazar aýdarmaǵanyn aıtty. Mamandar osy shaǵyn aýdandaǵy vıdeo baqylaý kameralaryndaǵy málimetterdi tekserip jatyr», — dedi Ázirbek.
Balaǵa qatysty málimetter jaqyn mańdaǵy aýdandar men oblystarǵa taratyldy. Polısıanyń habarlaýynsha, Arsen joǵalyp ketken kúni onyń ústinde qara tústi fýtbolka bolǵan, keýdesinde qyzyl jolaqtary bar, qara kók tústi trıko, aıaǵynda qara tústi krosovka bolǵan. Balanyń boıy — shamamen 100 santımetr, erekshe belgileri joq.
«Balaǵa qatysty qandaı da bir maǵlumaty bar nemese kezdesken azamattar bolsa myna telefon nomerlerine habarlasýdy suraımyz: 227-55-00; 227-55-01; 227-55-02; 8-701-523-17-07 nemese 102», — dedi Ázirbek.
