BAQ qazaqstandyq Gennadıı Golovkın men meksıkandyq Saýl Alvares arasyndaǵy ekinshi jekpe-jektiń ótetin orny men kúnin atady, dep habarlaıdy Qamshy.kz aqparat agenttigi Vesti.kz-ke silteme jasap.
Sońǵy aqparattarǵa súıensek, qos sportshynyń komandalary arasynda atalǵan jekpe-jekti uıymdastyrý sharalaryna baılanysty kelissózder júrip jatyr. Ázirge naqty málimet berilgen joq, alaıda sport salasynyń belgili sarapshylary ózderiniń naqty boljamdarymen bólisip jatyr.
ESPN sholýshysy Den Rafael suhbatynda qos boksshy arasyndaǵy kezdesýdiń ótetin orny men kúnin aıtty.
"Golovkın men Alvarestiń Las Vegasqa qaıta oralatynyna kúmánim joq. Bul kezdesý birinshi jekpe-jek bolǵan orynda, ıaǵnı "T-Mobile" arenasynda ótedi",-dedi ol.
Sholýshy boks keshiniń 15 qyrkúıekti ótetinine senimdi. Bul kúni meksıkandyqtar ózderiniń Táýelsizdik merekesin toılaıdy. Al Golovkın men Kanelo arasyndaǵy birinshi kezdesý 16 qyrkúıekte ótken bolatyn.
Qazirgi ýaqytta Saýl Alvares antıdopıng erejelerin saqtamaǵany úshin alty aıǵa sporttan shettetilgen. Boksshyny jarysqa qatysý quqyǵynan aıyrý ýaqyty alty aıǵa sozyldy. Demek tamyz aıynda Alvareske sharshy alańǵa shyǵýǵa múmkindik týady. Meksıkandyq boksyshynyń komandasy 15 qyrkúıekte revansh ótkizýge qyzyǵýshylyq tanytyp otyrǵandaryn aıtqan bolatyn.
Golovkın men Alvares arasyndaǵy revanshtyq kezdesý 5 mamyr kúni ótýi tıis edi. Alaıda dopıng daýyna baılanysty bul jekpe-jek keıinge qaldyryldy. Qazaqstandyq boksshy Kanelonyń ornyna amerıkandyq Vanes Martırosánmen kezdesý ótkizip, ekinshi raýndta qarsylaryn nokaýtpen jeńdi.
