Elimizdiń burymdylary men syrǵalymdaryn álemdik mańyzy bar merkelerimen quttyqtaı kele olar názik jandylar haqyndaǵy óz oılaryn ortaǵa saldy: Nurlan Álimjan: "Qyz balanyń aqylyna kórki saı bolǵany durys. Ataqty brend kıimderdi kıip, trendterden qalyspaǵandyǵynyń arqasynda tarıhta qalǵan bir sulýdy mysalǵa keltirińizshi? Joq. Tarıhtaǵy arýlar aqyldylyǵymen, parasatymen el esinde qala bildi. Alash zıalylarynyń jarlary olardyń qundy eńbekterin tirnektep júrip jınap, ózderi de qýǵynǵa ushyrasa da, erleriniń tileýin tilep, otyn sóndirmeýge tyrysqan ǵoı. Qazaqtyń qyzdaryna aldyńǵy býyn ájeleriniń áreketi sabaq bolýy tıis. Tán sulýlyǵyna ýaqyt beder salady, ájim túsedi. Al jannyń sulýlyǵy aqyndardyń jyryna aınalyp, ańyz bolyp aıtylyp jatady. Sondyqtan aty ańyzǵa aınalǵan qyzdarymyz kóp bolsyn degim keledi. Maǵan aqyldy názik jandylar unaıdy. "Erkek qulpyrdy" degen tirkes bolmaıdy. Biz qyz balalarǵa "qulpyryp ketipsiń " dep jatamyz. Endeshe merekelerińizben, arýlar!" Jasulan Qydyrbaev: "Men qoly kishkene qyzdardy unatamyn. Jarymdy tańdaǵanda da qolyna qaradym. Anam: "qoldary kishkene qyzdar ismer, sheber, úı sharýasyna ıkemi bar bolady", - dep keńes bergen. Kelinshegim de sportshy. Tipti burynǵy boksshy qyz desem, siz tań qalarsyz. Biraq meniń shańyraǵymnyń tútinin tútetý maqsatynda boksty tastady. Bir úıge bir sportshy jetedi ǵoı". Nurjan Kermenbaev: "Jaqynda meniń otbasyn qurǵanymdy kópshilik estigen bolar. Jasyrmaımyn jan-jarym meniń ónerimniń janashyry. Mamandyǵy ekonomıs. Aldymen anama tanystyryp, sodan keıin ǵana úılený týraly sheshim qabyldadym. Men qyzdardyń syrtqy sulýlyǵyna mán beremin. Qasyńda ertip júrgen arýdyń kelbetti bolǵanyn kim qalamasyn? Keıbireýler Nurjannyń qyzy ánshige ózi izdep kelip tanysypty dep aıtyp jatyr. Menińshe baqyt úshin kúresý kerek. Ol maǵan óziniń sezimi baryn bildirmese, men ony ómir baqı bilmeı óter edim ǵoı. Sondyqtan Nazymnyń áreketin quptaımyn".