Qaraǵandy oblysy Balqash qalasynda segizinshi synypta oqıtyn úsh oqýshy jalǵan lańkestikke qatysty dep tanylyp, kúdikti retinde ustaldy. Bul týraly oblystyq İİD baspasóz qyzmetinen habarlady.
Polısıanyń habarlaýynsha, 6 naýryz kúni 101 nómirine Balqash mektepteriniń birinde jarylǵysh zat qoıylǵany jaıynda habarlama túsken. Osydan keıin oqıǵa ornyna quqyq qorǵaý organdary men arnaıy qutqarý qyzmeti mamandary shuǵyl barǵan.
Tekserý qorytyndysy boıynsha, mektepten jarylǵysh zat tabylǵan joq.
"Jedel izdestirý sharasy qolǵa alynyp, polısıa qyzmetkerleri osy mektepte segizinshi synypta oqıtyn úsh oqýshyny anyqtady. Kinálilerdiń aıtýynsha, olar osylaı ázildegisi kelgen", - delingen habarlamada.
Terrorlyq akti týraly jalǵan aqparat taratqany úshin oqýshylarǵa qatysty sotqa deıingi tergeý amaldary júrgizilip jatyr. "Kazınform"
