"Ańyz adam" jáne "Juldyzdar otbasy" jýrnaldarynyń redaktory Jarylqap Qalybaı kezekten tys prezıdent saılaýyna qatysý úshin Ortalyq saılaý komısıasyna qujat tapsyrdy, - dep habarlaıdyTengrinews.kz tilshisi.
Ol Qazaqstan prezıdenttigine nıet bildirgen 22-adam boldy. Ortalyq saılaý komısıasy baspasóz qyzmetiniń habarlaýynsha, 55 jastaǵy Jarylqap Qalybaı 12 naýryz kúni ótinish berdi.
Eske salaıyq, 2014 jyldyń sáýir aıynda "Ańyz adam" jýrnalynyń tóńireginde daý týǵan edi, basylym Adolf Gıtlerdiń 125 jyldyǵyna arnalǵan nómir shyǵardy. Maqalalarda avtorlar Gıtlerdi óz halqynyń quqyǵy úshin kúresken pármendi tulǵa etip sıpattady. Jýrnaldyń bul nómiri qoǵam músheleriniń narazylyǵyn týǵyzdy. Ardagerler uıymdarynyń ókilderi jarıalanymdar Gıtlerdi madaqtaıdy dep málimdep, basylymdy jabýdy talap etti.
Keıin "Ańyz adamnyń" atyshýly nómiri tárkilendi. Buǵan qosa, Jarylqap Qalybaıǵa 15 AEK (27 780 teńge) kóleminde, jýrnal redaksıasyna 70 AEK (129 640 teńge) kóleminde aıyppul salyndy. Sot basylym redaktoryn ardagerlerge 13 mıllıon teńge kóleminde ótemaqy tóleýdi mindettedi.
Buǵan deıin Ortalyq saılaý komısıasy ókilderi 9 kandıdatty tirkeýge alýdan bas tartylǵanyn habarlaǵan edi: ekeýi tıisti jasqa jetpegendikten, jeteýi lıngvısıka komısıasy emtıhanyn tapsyra almady. 4 adam emtıhannan ótti, talaptarǵa sáıkestigi tekserildi, olarǵa qol qoıý paraqtary berildi. Saılaý naýqanynyń kelesi kezeńine Qanat Turageldıev, Qazaqstannyń qazirgi Prezıdenti Nursultan Nazarbaev, ózin-ózi usynýshy Lımana Qoıshıeva jáne kandıdattyqqa QKHP atynan usynylǵan Turǵyn Syzdyqovtar ótti.
Buǵan qosa, 12 naýryzda Ortalyq saılaý komısıasyna ýaqytsha jumyssyz Murat Telibekov, Kásipodaqtar federasıasynyń tóraǵasy Ábilǵazy Qusaıynov, "Ekologıalyq turaqtylyq" birlestiginiń tóraǵasy Serik Muqash, zeınetker Amantaı Asylbek jáne ýaqytsha jumyssyz Aıgúl Ótepova ótinish berdi.
