Polısıa aıaldamada er adamǵa sebepsiz shabýyldaǵan jasóspirimderge qandaı shara qoldanylǵanyn aıtty. Eske salaıyq, bul oqıǵa birneshe kún buryn Astanada bolǵan edi, onyń vıdeosy Internette jarıalandy. Oqıǵaǵa qatysty "Buzaqylyq" baby boıynsha qylmystyq is qozǵaldy.
Polıseıler jábirlenýshini tapqan, ol buzaqylardyń ústinen shaǵym túsirdi. Astana İİD baspasóz hatshysy Sofá Qylyshbekovanyń habarlaýynsha, 39 jastaǵy jergilikti turǵynnyń shaǵymy sotqa deıingi tergeýdiń biryńǵaı reestrine alyndy. Jábirlenýshi er adam Soltústik Qazaqstanda týǵan, Astanada jumys isteıdi.
"Qajetti tergeý áreketteri júrgizildi. Sotqa deıingi tergeý materıaldary sotqa joldanatyn bolady", - dedi Qylyshbekova. Onyń aıtýynsha, buzaqylyq jasaǵan úsh jasóspirimniń aty-jóni anyqtaldy, olardyń ekeýi kámeletke tolmaǵan, soǵan qaramastan, olar úshinshi aıyptalýshymen birge sot aldynda jaýap beretin bolady. Olar qomaqty aıyppul tóleýi nemese bostandyqtarynan eki jylǵa deıin aıyrylýy múmkin. Qazir buzaqylar eshqaıda ketpeý týraly qolhat qaldyrǵan.
Eske salaıyq, bul oqıǵa túsirilgen vıdeo "VKontakte" jelisinde jarıalanǵan edi. Vıdeodan eki jas jigittiń aıaldamada otyrǵan er adamǵa tıise bastaǵanyn kórýge bolady. Er adam balalardyń suraǵyna jaýap bermeıdi. Sol kezde kók kúrtesi bar jasóspirim qaltasynan pyshaq alyp shyqty. Keıin kóp sózge barmaı, er adamdy tepkileı bastaıdy. Bul kezde vıdeoǵa túsirip turǵan adamnyń kúlgeni estiledi. Rolık avtory men basqa da jasóspirimder áleýmettik jelilerden óz akkaýnttaryn óshirip tastady. Keıin polısıa úsh buzaqynyń da ustalǵanyn habarlady.
Pikir qaldyrý