21 naýryz kúni Qostanaılyq Áset pen Anar Súndetbaevtardy elbasy úılený toıymen quttyqtady. Nazarbaevtyń quttyqtaý hatyn oblys ákimi Nuraly Sádýaqasov jetkizdi.

Áset prezıdentti toıyna shaqyrǵan bolatyn.

"Men Nursultan Nazarbaevty qurmet tutamyn. Ol meniń kýmırim. Men ol kisige jaı ǵana hat jazyp, toıma shaqyrý qaǵazyn poshta arqyly jibergen edim. Hatyma jaýap kelgende tańqaldym. Qýanyshtan, tóbem kókke bir eli jetpeı qaldy. Ony aıtyp jetkize almaımyn", - deıdi Áset.

Naýryz qarsańynda otaý qurýdy Áset pen Anar burynnan oılastyrǵan  eken. Jastar Rýdnen ınstıtýtynda oqyp júrgende tanysqan. Qazir olar Magnıtogor metalýrgıa ınstıtýtynyń magıstratýrasynda bilim alyp jatyr. Olardyń jasy 24-te. Áset metalýrg mamandyǵyn tańdaǵan.

Prezıdenttiń quttyqtaý hatyn jetkizgen oblys basshysy ony jastarǵa oqyp berdi.

"Memleket basshysynyń tapsyrmasy boıynsha sizderdi zańdy nekelerińizben quttyqtaýǵa ruqsat etińizder. El prezıdenti Nursultan Nazarbaevtyń atynan, oblys basshysy ózimniń atymnan quttyqtaýdy qabyl alyńyzdar. Sizderge, mahabbat, tatýlyq, otbasyńyzdyń beriktigin, amandyǵyn tileımiz", - dedi Qostanaı oblysynyń ákimi Nuraly Sádýaqasov.

Sondaı-aq ákim jas otbasyǵa syılyq retinde teledıdar tabys etti.