Búgin, 26 naýryzdan bastap, Qazaqstan prezıdenttigine 3 kandıdat ózderiniń úgit-nasıhat jumystaryn bastaıdy.
Aıta keteıik, elimizdiń Ortalyq saılaý komısıasy prezıdenttikke kandıdat retinde “Nur Otan” partıasy atynan Nursultan Nazarbaevty, Qazaqstannyń komýnıstik halyq partıasy atynan Turǵyn Syzdyqovty, kezekten tys prezıdenttik saılaýǵa ózin-ózi usynǵan Ábilǵazy Qusaıynovty tirkegen bolatyn.
Olardyń barlyǵy da Qazaqstan prezıdenttigine kandıdattardyń memlekettik tildi erkin meńgergendigin anyqtaý jónindegi lıngvısıkalyq komısıasynyń emtıhanyn tapsyryp, “Qazaqstan Respýblıkasyndaǵy saılaý týraly” Konstıtýsıalyq zańynda talap etiletin barlyq qujattardy OSK-ge ótizgen.
Sonymen qatar, 1 mln 60 myń teńge kólemindegi saılaý jarnasyn da tóledi. Qazaqstan prezıdenttigine kandıdat bolyp tirkelý úshin úmitkerler saılaýshylardyń 93 myńnan astam rastalǵan qolyn jınaý kerek bolatyn.
Eske sala keteıik, 25 naýryzda kandıdattardy tirkeý merzimi aıaqtaldy.
“Prezıdent saılaýyn bekitkennen bastap, qajetti jumystardyń barlyǵyn atqardyq. Qanshama semınar, otyrystar ótti. Saılaý naýqanyn kezeń-kezeńge bólip qarastyrsaq, birinshi kezeńi aıaqtaldy. 26 aqpannan bastap, prezıdenttik saılaýǵa kandıdattar ózderin usyna bastady. Ózderińiz biletindeı, 27 kandıdat Ortalyq saılaý komısıasyna úmitker retinde óz ótinishterin bergen. Sonyń ishinde, 25 kandıdat óz ózin usynǵan, eki kandıdat respýblıkalyq qoǵamdyq birlestik joǵarǵy organynan usynyldy. Usynǵan azamattardyń arasynda eki áıel boldy: Qoıshıeva Lımana jáne Ótepova Aıgúl. Kandıdattardyń ortasha jasy – 54 jasta eken. 2005 jylmen salystyrǵanda, sol jyly 18 kandıdat ótinish bergen eken, onyń ishinde úsh kandıtdat qalǵan. 2011 jyly 22 kandıdat ótinish bergen, onyń ishinde tórt adam qalǵan”, – dedi OSK hatshysy Baqyt Meldeshev.
