"Tildi meńgerý qıyn, arnaıy kýrstarǵa jazylý kerek" degen syltaýdy aıtatyn jurtqa almatylyq 18 jastaǵy Araılym Meldeshovanyń óz jaýaby bar. Túrik tilin arnaıy kýrstarǵa barmaı-aq, serıal kórý arqyly jetik meńgerip alǵan Araılym tipti Qazaqstan men Túrkıa elderi arasynda ótken quryltaıda resmı aýdarmashy bolyp ta úlgergen. Osy rette Tengrinews.kz tilshisi eki el arasynda aýdarmashy bolǵan, tildi saýatty jazýdy serıal arqyly úırengen Araılymmen tildesip qaıtqan edi.
Onyń aıtýynsha, alǵashynda tilge degen qyzyǵýshylyǵy múldem bolmapty. Motıvasıa retinde óziniń súıikti eli Túrkıa men sol elde mekendeıtin azamattar bolypty. "Men Almatydaǵy № 173 mektep-lıseıde oqydym. Ol jerde tilge degen talap qatal boldy. Bilim jaǵy da, til jaǵy da jaqsy bolýy basty shart. Túrkıa eline, olardyń salt-dástúrine, tiline degen qyzyǵýshylyq bala kezimnen bastaldy. Kishkentaı kezimde teledıdardan solardyń serıaly men fılmderin kórip óstim. Keshke otbasymyzben jınala qalyp, túrik serıaldaryn tamashalaıtynbyz. Keıde daýystap jatqan adamdardyń aýdarmasy estilmeı qalyp, ózim ne dep aıtqandaryn túsine qoıatynmyn. Sol eldiń tilin bilý kerek degen maqsat eshqashan qoımappyn. Túrkıa eline qyzyqqanym sonshalyq, tilin qalaı úırenip alǵanymdy bilmeı de qaldym", - deıdi ol. Araılym qazaqtar men túrikterdiń bet-álpeti, tili, tipti salt-dástúrleri uqsas bolǵandyqtan meńgerý ońaı bolǵanyn aıtady. 
"Tildi meńgerý tolyqtaı óz tarapymnan boldy. Ata-anam ıa bolmasa muǵalimderim májbúrlegen joq. Qonaqjaılyǵy qazaqtan kem túspeıtin, kelgen qonaqty joq degende bir kese shaı ishkizbeı jibermeıtini, alǵys aıtý, keshirim suraý sekildi túrik ultyna tán qasıetti men qazaqtarǵa uqsattym. Tildi bylaı qoıǵanda, tipti salt-dástúrlerine deıin uqsas bul ulttyń tilin meńgerý asa qıyn bolǵan joq. Árbir qyz sekildi bos ýaqytymda serıal kórgenimdi unatamyn. Ásirese túrik serıaldaryn. Ýaqytymdy qury serıal kórip emes, til úırenip ótkizdim dese bolady. Bastapqyda aýdarmamen, keıin sýbtıtrlarmen, qazir tek túrik tilinde kórip júrmin", - deıdi Araılym. 
Baqytyna oraı keıipkerimizdiń armany oryndalyp Túrik eline barýdy buıyryp, tipti resmı aýarmashy bolyp barǵan eken. "Alǵash ret 2015 jyly Ystambulda boldym. Ol kezde tildi shamaly túsinetinmin. Tilimniń deńgeıi ymǵa kelip, endi úırenip júrgen kezim. Ákemdi Qazaqstan memleketi men Túrkıa eli quryltaıynyń baspasóz konferensıasyna shaqyrǵan. Ákem bul jańalyqty estı sala, meniń tildi úırenip júrgenimdi bilip ózimen birge aýdarmashy bolyp apardy. Bul is-shara maǵan úlken tájirıbe boldy. Aıtady ǵoı, tildi meńgergiń kelse sol ortada júrip, tek sol tilde sóılesýge tyrys dep. Serıaldan kórgen bólek, shynaıy ómirde júzbe-júz kezdesip sóılesken múldem bólek eken", - deıdi ol. Araılym taǵy eki ret Túrkıa elinde bolǵanyn jáne ár barǵan saıyn múldem basqa jańa kózqaraspen qaraıtynyn, tulǵa retinde ózi ózgerip otyrǵanyn aıtty. 
"Baqytyma qaraı Túrkıa memleketinde taǵy eki ret boldym. Basynda qysylyp, sóılesýge uıalatynmyn. Ekinshi, úshinshi ret barǵanymda áńgimege ózim qolqa salyp, lázzat alatyn boldym. Tipti bir kezde dúkenshi men týrıske kómekteskenmin bar. Týrıs ne kerektigin ymmen túsindirip jatsa da, dúkenshi túsinbeı men kelip ne qalaıtynyn surap, keıin ekeýi birin-biri túsine almaǵanyna kúlip, maǵan alǵysyn aıtyp tarqaǵan. Osyndaı kezderde til bilýdiń artyqshylyǵy bar", - deıdi ol. "Bos ýaqyt bárinde bar, tek ony tıimdi jumsaý ár adamnyń óz qolynda" degen Araılym tildi áli kúnge deıin meńgere almaı júrgenderge keńes berdi.
"Qaı salaǵa bet burmasań da, qandaı ispen aınalyspasań da barlyq jerde tózimdi bolý kerek. Ustanymym bastaǵan isti aıaǵyna deıin jetkizý. Jańadan til úırenip júrgenderge sol tildi jazyp emes, eń birinshi kóp tyńdap, kóp sóıleý kerektigin aıtqym keldi. Tildi bilip júrý basqa, sol tilde sóılesý múldem basqa. Mysalǵa, til bilse de sóılesýge qysylatyndar bar. Sondyqtan úırenip júrgenińizde sol tilde sóılesýge tyrysyńyz. Bastapqyda "Men dúkenge bara jatyrmyn" , "Saǵat keshki alty boldy" dep bastap, keıin úlken mátinmen sóıleýge ózińizdi ıkemdep alsańyz ońaı bolady", - deıdi ol. 
Araılymnyń aıtýynsha, bolashaqta bıznes salasyna bet burǵysy keledi eken. Til men bıznesti baılanystyryp ózi súıetin ispen aınalysqysy keletinin aıtty. "Qolyma armandaǵan qyzyl dıplomymdy alǵannan keıin bıznes salasyn baǵyndyrsam deımin. Bıznesti sheteldiktermen baılanystyrǵym keletindikten, taǵy fransýz, ıtalıan tilderin meńgerýim kerek. Tildi bilgen kezde adamnyń ómirge degen kózqarasy ózgeretinin aıtqym keledi. Basqa ult ókilderiniń saltyn, ádet-ǵurpyn, turmys-tirshiligin, tilin bilý arqyly sen tulǵa retinde ósetin bolasyń", - deıdi Araılym Meldeshova.
Derekkóz: tengrinews.kz
