Nazarbaevtyń árkez ǵylym-bilim máselesine erekshe kóńil bóletini beseneden belgili. Bıylǵy Joldaý burynǵydan ózgeshe boldy deýge negiz bar. Sebebi bilim máselesindegi mynandaı máselelerdi atap ótti: balabaqshaǵy beınebaqylaý kameralary, ustazdar statýsy, jınalystardy azaıtý, JOO-dyń reıtıńisin ózgeshe anyqtaý, Reseıge oqýǵa ketetin jastar. Munyń bári sońǵy jyldary eń kóp talqylanǵan máseleler bolatyn.
Astananyń demografıalyq hal-ahýalyna baılanysty, anyǵyraq aıtqanda, halyqtyń ósýine baılanysty úsh aýysymdy mektepter paıda bolatyny aıtylǵan edi. Bul másele de Elbasyna nazarynan tys qalmady. "Úsh aýysymdy mektep degen ne sumdyq? Bala qashan oqıdy, qashan demalady?" dep shoshyǵan ol úsh aýysym degenniń kózin qurtýdy tapsyrdy.
Balany zorlaıtyn pedofılder, balany uryp-soǵatyn eresekterdiń kóbeıgen zamanynda bala qaýipsizdigi ata-ananyń ýaıymyna aınalǵany bultartpas shyndyq. Elbasy osyny eskere otyryp, barlyq balabaqshalarǵa beınebaqylaý kameralaryn ornatýdy buıyrdy.
"Joǵary oqý oryndarynyń reıtıńisin durys baqylamaımyz. Olardyń qanshalyqty ónimdi jumys jasaıtyndaryn bitirip ketken stýdentterdiń jumysqa turýymen baılanystyryp anyqtaý qajet" dedi Nursultan Ábishuly. Eger belgili bir JOO-nyń stýdenti mamandyǵy boıynsha jumys istese, quba-qup. Al, jumys taba almaı, sandalyp júrse, ony oqytyp-toqytqan JOO-ny jabý kerek" dep qara qyldy qaq jardy.
Reseıge oqýǵa ketetinder jastar máselesinen de Elbasy habardar bolyp shyqty. Ondaı statısıkaǵa tań qalmaıtynyn da jetkizdi. "Reseıge ketetin jastardyń kóbisi soltústikten ekendigi belgili. Biraq ońtústik aımaqtan baratyn jastar da kóp eken. Muny qalaı túsinemiz?" dep saýal qoıdy. "Qaı jerde bilim sapasy myqty, sol jaqta ketetini túsinikti" degen Nazarbaev bul máselege alańdaýly ekendigin baıqatty.
