Búgin bilim júıesi, jer, turǵyn úı máselesi, quqyq qorǵaý organdary ózge de ózekti taqyryptardy qaýzaǵan Nazarbaev jastardy da nazardan tys qaldyrmady. 2019 jyldy Jastar jyly dep jarıalaýdy usyndy, dep habarlaıdy Qamshy.kz aqparat agenttigi.

«Ár Qazaqstan azamaty reformalardyń mánisin, Otanymyzdy órkendetý jolynda olardyń mańyzdy ekenin túsiný kerek. Al muny jetkizý bizdiń mindetimiz. «Rýhanı jańǵyrý» baǵdarlamasyn bári qoldady. Oǵan qosymsha «Bes áleýmetti bastamany» kóterdik», - degen Elbasy jastar men otbasy ınstıtýtyn qoldaý – memlekettik saıasattyń basymdyǵyna aınalýy tıis ekendigin eskertti.

«Jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerek. Kelesi jyldy «Jastar jyly» dep jarıalaýdy usynamyn», - dedi Nursultan Nazarbaev.

Buǵan qatysty L.N. Gýmılev atyndaǵy Eýrazıa ulttyq ýnıversıtetindegi tarıh fakúltetiniń dekany Tilegen Sadyqov pikir bildirdi. Ol Elbasynyń búgingi Joldaýyn «jas mamandarǵa jarqyn jol ashqan birden bir joldaý» dep esepteıdi.

«Elbasy N.Á. Nazarbaevtyń bıylǵy jylǵy joldaýynda elimizdiń tiregi – jastar máselesine jete mán bergendigimen asa mańyzdy dep sanaımyz. Qoǵamnyń damý úderisin ilgeriletýdiń jetekshi kúshi jastar ekendigi aqıqat dúnıe. Joldaýda joǵary oqý oryndaryna mamandyq alyp shyqqan jastardyń óz mamandyǵy boıynsha jumysqa turyp, elimizge qyzmet etýi máselesi qoǵamnyń damý tendensıasyn anyqtaıtyn faktor ekendigine zor maǵyna berilgen.

Oqý bitirýshi túlekterdiń mamandyqtaryna sáıkes jumys isteýiniń áleýmettik-ekonomıkalyq astary túptep kelgende elimizdiń damý ındeksin anyqtaıdy. Bilikti maman shyǵarý jáne ony jumyspen qamtamasyz etý bilim berýshi jáne jumys usynýshy mekemeler arasyndaǵy bar baılanysqa jańasha sıpat beretin bolady. Ekonomıkalyq aspektide elimizdiń órkendep damý strategıasy júzege asatyn bolsa, al áleýmettik turǵyda jas mamannyń jaqsy ómir súrý qaǵıdattary oryndalatyn bolady. Kásibı sheberligi shyńdalǵan maman qoǵamymyzdyń ekonomıkalyq turaqtylyǵyn qamtamasyz etedi.

Elbasynyń joldaýy joǵary oqý orny salasynda qyzmet etetin pedagogtarǵa tyń serpilis ákelip, jańa formatta maman daıarlaý jáne onyń jumysqa qabyldaný traektorıasyn aıqyndaýdaǵy basty baǵdarymyz», - dedi Sadyq Tilegen.

Aıta keteıik, Elbasy 5 qazanda Aqorda rezıdensıasynda halyqqa Joldaýyn jarıalady. Joldaýyn jarıalamas buryn Qazaqstannyń búgingi kúnge deıingi jetistikterin tizip, aldaǵy josparlardy atady.

Elbasy Joldaýyn ulttyq telearnalar men Aqordanyń Feısbýktegi resmı paraqshasy tikeleı efırde kórsetti.