6 jyl týraly 6 abzas
2012 jyl. Almatyǵa alǵash kelgen kezim. Habarda «Sonymen, solaı deıik» dep júrgende «Qazaqstan» arnasyna, «Aıtýǵa ońaıǵa» Qudaıdyń (Serik Abas-shah keıpinde) ózi tap qaldy. Janar Baısemizova degen esimdi de ulttyq arna tórinde alǵash estidim. Sóıtsem, bizdiń bastyq eken. «Aıtýǵa ońaıdy» qalaıda efırden sátti shyǵaramyz dep júrgende jıi kezdestik.
Aıtqanynan qaıtpaıtyn, óz isin tıanaqty tyndyratyn, kásibı maman ekendigi birden baıqalatyn. Men de ózimdi jańa ortada, jańa qalada erkin ustaýǵa tyrystym. Janar Baısemizova da sony sezgen bolýy kerek, birde meni maqtap, ápkelik meıirimdilik tanytqany qatty esimde qalypty. Odan keıin ol kisini ulttyq arnanyń Almatydaǵy fılıalynan kórgen emespin.
Bir jyldan astam ýaqyttan keıin men de ulttyq arnamen qosh aıtystym. «Prodúser bol» degen usynystan bas tartyp, jan tynyshtyǵyn ornatýdy qaladym. Sebebi «Aıtýǵa ońaıdan» keıin biraz eseńgirep qalǵanym ras. Arada jyldar zýlap ótti.
2016 jyldyń qyrkúıeginde Baısemizova degen famılıa qaıtadan aldymnan shyqty. «Qamshyǵa» endi ǵana ornalasqan kezim bolatyn, tanys famılıanyń «The lobster nemese qazaq qoǵamyndaǵy «netaktıchnyı» suraqtar» degen ataýmen blog jarıalaǵanyn kózim shalyp qaldy. Qalaı kirip, bir demmen oqyp shyqqanymdy baıqamaı qaldym. «Baıdalydan Baısemizovaǵa jaýap» degen maqalamdy redaktor Darhan Muqanteginiń «Jany ashyǵan keıippen jynǵa tıetin suraq qoıatyndar bar. Ol qandaı suraqtar?» dep ózgertkende ishim biraz ashydy.
2018 jyly Janar taǵy aldymnan shyqty... Trener, motıvator retinde... Eki jyl buryn jazylǵan Baısemizova blogynyń maǵynalyq tereńdigin, artar júginiń aýyrlyǵyn jete túsinbegenimdi endi túsindim.
Alty jyldan keıin Janarǵa ınstagramdaǵy «daırekt» (habarlama) arqyly hat jazdym. Almatyda trenıń uıymdastyratynyn estigenimdi, men de soǵan qatysqym keletindigin ótinish retinde aıttym. «Joq» demedi.
7 qazan. 700 teńgeniń jyry
Trenıńke qaıyn ápkem Nazgúl ekeýmiz birge baratyn bolyp sheshtik. Negizi jýrnalıs Janardyń motıvatorǵa aınalyp ketkendigin Nazgúl arqyly bildim. Birtindep ózim de Janardyń ilimine qyzyǵýshylyq tanyttym. Qazannyń jetisi kúni keremet kóńil-kúımen oıanyp, trenıń ótetin jer –Atakenttegi «Atalanta» qonaqúıine jetýge asyqtyq. Iandekstiń taksıin shaqyrdyq. 700 teńge eken. Atakenttegi aty shýly tıinniń artynda ornalasqan «Atalantaǵa» jetýimiz muń boldy. Sóıtsem, velosıpedshilerdiń marafony bolyp jatyr. Biz bolsaq habarsyzbyz. Eki-úsh ret aınalyp, áıteýir jaqyn mańnan túsip qaldyq. Baǵdarshamnyń jasyl túsi qashan janady dep turǵanymyzda janymyzǵa Janar jaqyndady. Alty jyldan keıingi kezdesý osylaı bolady dep kim oılady. Eń quryǵanda bir shoq gúldi satyp almaǵanyma ókindim. Sebebi baqyttan bal-bul jaınaǵan Janardyń beınesi kózime ottaı basyldy. Rýhanı praktıkamen aınalysý úshin ataǵy dúrkirep turǵan tusta jýrnalısıkadan ketýi men úshin erlikke para-par. «Menimen jaǵalasyp, marafon uıymdastyrǵandaryn qarasańshy. Meniń keletinimdi qaıdan bilip qoıǵan» dep ázildegen ol azdap qobaljyp turǵanyn jasyrmady. Men ishteı kerisinshe rızashylyq bildirdim. Janardyń arqasynda qanshama el-jurttyń aýzynan túspegen Almatynyń ataqty tıinin birneshe rakýrstan asyqpaı kórip shyqtym.
18 oryn týraly 18 sóz
«Atalanta». Dáliz. Úndiler. Tizim. Symbat. Selfı. Konferens-zal. 500. 18. Tursynbaeva. Asanberdi. Satybaldıeva. Dıktofon. Konsentrasıa. Jaryq. Shapalaq. Fotograf. Janar...
2016 jyl týraly 9 sóılem
Janar trenıńti bastap ketpes buryn qasyna qurbysy Aınur Asanberdini shaqyrdy. Ol óz kezeginde «úlken turǵanda sóılemeımin» dep kishilik tanytyp, sahnaǵa aıtysker aqyn Aınur Tursynbaevany shaqyrdy. Qurmet bildirip, trenıńke qonaq retinde kelgen halyqtyń súıiktisi óz ómirinen syr shertti. «2016 jyly kóptegen adamǵa aýyr jyl bolǵan sekildi. Men úshin de solaı boldy. Depressıa degenge ushyradym. Tuńǵıyqqa batyp bara jatqan jerimnen aman qaıttym. Meni qutqarǵan dúnıe osyndaı trenıńter bolatyn. Qazaq «Qaıǵy túbi – tuńǵıyq, batasyń da ketesiń, táýekel túbi – jel qaıyq, ótesiń de ketesiń» dep beker aıtpaǵan. Qasiret shekkennen ómir ońalmaıtynyn túsingen men táýekelge bel býdym. Shúkir destim. Trenıńke barýdan qorqýdyń qajeti joq» dep oıyn qorytyndylady ol.
Jarokov 124
Aınurdan keıin qolyna mıkrofon alǵan jýrnalıs, nýmerolog Aınur Asanberdi armandar kartasyn 10 jyl buryn jasaǵanda týǵan-týysy tań qalysyn jasyrmaı, joldasy ekeýin qıalılarǵa balaǵanyn ashyp aıtty. Ýaqyt óte kele armandary aına-qatesiz oryndalǵanda olardyń tańyrqaǵandary áli esinde eken. «Búginde joldasym ekeýmiz 1000 adamdy jumyspen qamtamasyz etip otyrmyz. Bári-bári trenıńterdiń arqasynda. Adam óz oıyn baqylasa, armandaı bilse, alynbaıtyn qamal joq ekenine kózimiz áldeqashan jetken. Bireýler bıznes asharda bul meniń sátti jylym ba dep nýmerologtardyń kómegine júginedi. Bir aıta ketetini, sátsiz perıodtyń ózi maksımým 2 jylǵa deıin jalǵasady. Tabandylyq tanytyp, maqsatyńyzdan aınymasańyz, birneshe aıda, jarty jylda-aq barlyq kedergilerdiń kózin joıa alasyz. Myna bıznesim sátti bolady ma, bolmaıdy ma dep boljaǵansha marketıńtik zertteý júrgizgen abzal. Usaq-túıekke deıin bári esepteýli bolsa, bıznes mindetti túrde sátti bolady. Mysaly, óz basym Almatydaǵy «Tonýs klýbty» ashpas buryn Jarokovtyń boıynda kúndiz-túni ary-beri ótken qyz-kelinshekterdiń sanyn sanaýmen aılar ótkizdim. Klýbtyń turǵan ornyn tańdaýdan qatelespegenime kózim ábden jetkende ǵana keńseni satyp aldym da bıznesti bastap kettim» dedi Aınur.
33 jas, 38 jas
33 jasynda Isa paıǵambardy (ǵ.s.), 63 jasynda Muhammed paıǵambardy (s.ǵ.s) Alla Taǵala kókke aldyrtqan deıdi. Sondyqtan da Janar hanymnyń aıtýynsha, bul jasqa kelgende adam ózgeriske daıyn turady. Óz-ózin izdeı bastaıdy. «Myqty jýrnalıs bolsam», «teksti kúshti jazsam» dep armandap júrgende Janardyń sanıtarka bolyp jumys istegeni men úshin sensasıalyq jańalyq boldy. «Óz mamandyǵymmen jumys istesem» dep Qudaıdan jylap ta, surap ta tilegen tilektiń oryndalǵanyn bilemiz. Álemniń jartysyn aralap, «Sheteldegi qazaq balalary» jobasyn kók jáshikke shyǵaryp, qazaq televıdenıasyn dúr silkindirgen, Qazaqstan jýrnalıser odaǵynyń múshesi, «Halyqtyń súıiktisi» ulttyq syılyǵynyń ıegeri Janar Beısemiz-Kolesnıkova 33 jasynda rýhanı praktıkaǵa den qoıady.
38 jasynda turmysqa shyǵyp, jýrnalısıkamen qosh aıtysady. Qyz-kelinshekterge arnalǵan «Eshnársege qaramastan baqytty bol» dep atalatyn avtorlyq trenıńter ótkizýmen aınalysatyn Janar «Siz trenıńke keldińiz, asyǵa kútken jeksenbilik demalys kúnińizdi maǵan arnadyńyz, ilim jınaýǵa keldińiz, demek siz ózińizdi tanýǵa jol saldyńyz, sol úshin de sizderge alǵysym sheksiz» degendi san márte ret qaıtalap aıtty. Jalpy, ár kúndi Allaǵa madaq aıtýdan, tań atqanda tiri bolyp oıanǵan úshin raqmet aıtýdan bastaýǵa keńes berdi.
5 mınýt=5 saǵat
«Tańerteń erte turýdy ádetke aınaldyryńyz. Erte turǵan áıeldiń bir isi ǵana artyq emes. Erte turǵan adamnyń boıynda erekshe kúsh-qýat, energıa bolady. Oıatqyshtyń dybysyn estı sala «Bes mınýttan keıin turamyn» degen oıdan arylyp, birden turyp ketińiz. Bes mınýttan keıin tursańyz, ómirińizdiń bes saǵatyn zaıa ketirdim deı berińiz. Bir mınýt artyq uıyqtaǵannyń ózinde bir saǵatyńyz kemıdi. Muny tikeleı maǵynasynda túsinbegen abzal. Saǵattyń tili óz ornynda turǵanmen, berekesi bolmaıdy» deıdi Janar.
40 mınýttyq qulshylyq
«Oıanǵannan keıin birden turyp ketýge asyqpańyz. Tiri bolyp oıanǵanyńyz úshin raqmet aıtyńyz. Búgingi kúndi Alla razylyǵy úshin ótkeretinińizdi aıtyńyz. Dúnıege ákelgen áke-shesheńizdi elestetip, olardy renjitken sátter bolsa, keshirim surap, jasaǵan qamqorlyqtary úshin ishteı alǵys bildiresiz. Ata-enege de sóıtińiz. Ata-anaǵa da, ata-enege de sálem salýdy abyroı sanańyz. Sol arqyly óz menmendiligińizdi basasyz. Kún saıyn dýshqa túsýge keńes beremin. 3 ret raqmet aıtyp, sý ishemiz. Jalpy, sý isherde jaqsy oı oılap, sýdyń móldirligi men táttiligine mán berip, ishken abzal. Sosyn rýhanı praktıkamen aınalysyńyz. Kúnine 40 mınýt Qudaıǵa qulshylyq etseńiz, ómirińiz ózgeredi»,- deıdi Janar Baısemiz.
Áıel adamnyń fıgýrasy = 8
«Áıel adamnyń fıgýrasy qandaı bolýy kerek?» dep ortaǵa saýal tastady Janar. Zalda otyrǵandardyń bireýi «gıtaradaı» dep aıǵaılady. Zal dý kúldi. Sóıtsek, jaýaby segiz degen san eken. Jyr-dastandarda ádemi qyzdy qypsha bel dep sýretteıtinin bilemiz. Alaıda onyń rýhanı praktıkaǵa, áıeldiń energıasynyń molaıýyna qatysy bar dep esh oılamappyn. Janardyń aıtýynsha, názik jandynyń beli jińishkergen saıyn energıasy tasıdy.
Kári qyzdarǵa 7 keńes
-Jigit izdeımin dep túngi klýbqa, restoranǵa barmańyz;
-Súımegenge súıkenbeńiz;
-«Kári qyzbyn» dep jylap-syqtamańyz. Bári ýaqytsha ekendigin túsinińiz. Jalǵyzdyqty qabyldańyz. Osy ýaqytty maǵynaly ótkizińiz;
-Jumysqa tym berilmeńiz. Karera qýamyn dep energıany sarqyp almańyz!
-Otbasyly adamǵa aldanbańyz. Jolamańyz;
-Fızıologıa úshin, densaýlyq úshin dep kúnáǵa batpańyz. Bári bos áńgime;
-Rýhanı praktıkamen aınalysyńyz.
85 bet = 3000 teńge
Janar Baısemiz kishkentaı kezinde jazýshy bolamyn dep te armandaǵanyn aıtyp berdi. Biraq «ne týraly jazamyn?» degen suraq maza bermegenin jasyrmady. Kúni keshe ǵana «Janar Baısemizdiń rýhanı praktıkasy» degen kitap qalyń oqyrmannyń qolyna tıdi. Óz-ózine senip, aqyly men qaıraty alyp shyqqan Janardyń kitabyn satyp alýǵa asyqqan jandardyń biri men boldym. 85 bettik dúnıeni eki saǵattaı ýaqytta oqyp shyqtym. Biraq kóńilime toqyp shyqtym deı almaspyn. Bul kitap qolymnan túspeıtin kitapqa aınalatynyna shúbám joq. Aldyn-ala eskerteıin, Janardyń bul kitabynda eshqandaı ǵylymı jańalyq joq. Alaıda shynaıy ómir bar. Ápkeniń sińlilerine aıtar aqyly bar.
Qalǵany qupıa bolsyn…
