Astana qalasynda segizinshi Azamattyq forýmda Elbasy óziniń jastyq shaǵyn esine aldy dep jazady Qamshy.kz aqparat agenttigi. 

"Men soǵystan keıin kedeıshilikti bastan ótkergen qarapaıym aýyldyń balasymyn. Ne kıerge kıim, isherge as bolmaǵan kúnderimiz kóp edi. 15  jasqa deıin toq bolǵan kezim esimde joq. Biraq bul jaıt myqty bolýǵa septigin tıgizýi múmkin. Keıin men aýyr domna peshinde qyzmet ettim», dep Elbasy ótkenin eske aldy.

♦Nursultan Nazarbaev: Uly dalanyń jeti qyry

Sonymen birge ol jastardy shydamdy ári tózimdi bolýǵa shaqyrdy.

«Sol sebepten de qazirgi jastar talmaı eńbek etýi kerek. Myna álem ádilettilikten ǵana turady degenge senbeý kerek. Kerisinshe, qarsy kelgen ádiletsizdikti eńserip, jeńe bilý kerek», dep Nursultan Nazarbaev jastarǵa óz keńesin aıtty.

QR Prezıdenti sóz arasynda Djon Kennedıdiń «bılik maǵan ne isteı alady dep emes, men elim úshin, bala-shaǵam úshin ne isteı alamyn dep oılaný kerek» degen sıtatasyn tilge tıek etti.