Álı Oqapov Qaırat Nurtastyń aldyn orap, EMA 2013 Eýrazıalyq mýzyka premıasynyń “Er kisiler arasynda úzdik oryndaýshy” ataǵyn jeńgen bolatyn. Alaıda, ánshi gonzo.kz saıtyndaǵy suhbatynda Qaırat Nurtasqa básekeles bola almaıtynyn jasyrmady.
“Men “úzdik án”, “úzdik beıneklıp” jáne “úzdik oryndaýshy” nomınasıalarynan “Alǵa” beıneklıpimmen “úzdik beıneklıp” nomınasıasyn jeńýge úmitti boldym. Klıpke meniń dostarym – Serik Sápıev, Asylhan Tólepov tústi. Montajǵa “567 Production” stýdıasy jaýapty boldy. Al “úzdik oryndaýshy” nomınasıasy maǵan buıyratynyn men kútpegen edim. Bári Qaırat Nurtasty jaqsy biledi. Men ózimdi oǵan tanymaldylyq jaǵynan básekeles sanamaımyn. Qaırattyń jankúıerleri ataq maǵan berilgendi qalaı qabyldaıtynyn bildim. Olar “satyp aldy, Álı bizdiń Qaıratpen salystyrýǵa da kelmeıdi” dep shyǵady. Bul ataqqa barynsha laıyqty bolýǵa tyrysyp baǵamyn” – deıdi ánshi.
Ánshi ózin qos tilde de saýatty sóıleıtin, dástúrin qurmetteıtin “eýroazıattar” qatarynan sanaıdy eken. Oqapov komersıalyq ánder jazbasa da, toı bıznesti jaqsy tabys kózi sanaıdy. Ol suhbat barysynda qandaı túster men stıldi unatatynyn jarıa etti.
“Men eń bastysy kıimniń yńǵaıly bolýyna mán beremin. Jaqsy kóretin túsim – qara. Negizinen snıkerster (krosovka) kıemin. Jarqyn tústerdi sırek qoldanamyn, salqyn tústerde kıingendi jón sanaımyn”, – deıdi Oqapov.
Álı suhbat barysynda qorqynyshtarynyń kóp ekenin jasyrmady.
“Meniń qorqynyshtarym kóp. Elarnadaǵy “Synaq” realıtı-shoýynda birtalaı qorqynyshtarymdy jeńdim deýge bolady. Men jylqydan ózge barlyq janýarlardan qorqamyn. Tipti úı janýary bolsyn: mysyqtardan mende alergıa, al ıtter meni Taldyqorǵanda bala kezimde talaǵan bolatyn. Balyq jemeımin, taraqandardy, jándikterdi unatpaımyn”, – dep aǵynan jaryldy ánshi.
Oqapov tilshige ánshi bolmaǵan jaǵdaıda kim bolatynyn aıtyp berdi.
“Men ánshi bolmaǵan jaǵdaıda áskerge barar edim. Kópshiliktiń ánshiler “názik jandy” deýlerine kelise almaımyn. Máselen men qarýdan óte jaqsy ata alamyn, mektepte 100 metr qashyqtyqqa júgirýden alǵashqysy bolatynmyn”, – dedi ánshi.
