Búgin Bilim jáne ǵylym vıse-mınıstri Tahır Balyqbaev 2015 jyly memlekettik bilim berý granttarynyń 75 paıyzy qazaq mektebin bitirgen túlekterge beriletindigin málimdedi.

Bıylǵy jyly bólinetin memlekettik bilim granttarynyń sany – 39 994. Onyń 32 168-i bakalavrıat, 7 241-i magıstratýra, al qalǵan 623-i doktorantýraǵa bólingen. Jyldaǵy ádet boıynsha memlekettik granttardyń basym kópshiligi tehnıkalyq mamandyqtarǵa berilmek. Bıylǵy tehnıkalyq mamandyqtardyń úlesi 42,4 paıyzdy qurap otyr.

«Bıylǵy jyldyń memlekettiń tapsyrysyndaǵy basty erekshelik – granttardyń oqý tiline baılanysty bolyp otyr. Memlekettik granttardyń 75 paıyzy qazaq bólimine jáne 25 paıyzy orys bólimine bólinetin bolady. Osy ýaqytqa deıin granttar eki tilge shamalas proporsıamen bólinip keldi. Biraq endi mektep bitirýshilerdiń úlesi boıynsha, qazaq mektebin bitirgender orys mektebin bitirgenderden basym. Sondyqtan osyndaı sheshimge keldik», – dep vıse-mınıstr taǵy bir jańalyqpen bólisti. Aıta keteıik, bıylǵy jyly 62 384 oqýshy UBT-ny qazaq tilinde tapsyrsa, 25 398-i orys tilinde tapsyrǵan bolatyn.