Qazaqstannyń «Aq jol» Demokratıalyq Partıasy Mańǵystaý Oblystyq fılıaly janyndaǵy «Aq jol-jastar» jastar qanaty Nur-Sultan qalasyndaǵy L.Gýmılev atyndaǵy Eýrazıa ulttyq ýnıversıtetinde KSRO jáne QSR Halyq aǵartý isiniń ozyq qyzmetkeri, belgili tarıhshy, muraǵatshy-ǵalym, aýdarmashy, Qazaqstan Jazýshylar jáne Jýrnalıser Odaǵynyń múshesi, 400-den astam muraǵattyq zertteý maqalalarynyń avtory Zıada Ijanulynyń «Ashshy sabaqtar», «Asyl qazyna», «Jaraly jyldar», «Mangyshlak», «Týrgaıskıı oblast, «Tobanıaz», «Alamesek», «Alasapyran», «Asyl mura» «Tárkileý qasireti» atty 10 tomdyq kitaptarynyń tusaýkeserin ótkizdi.

«Rýhanı jańǵyrý» aıasynda ótken jıynǵa Eýrazıa ulttyq ýnıversıtetiniń profesor-oqytýshylary, Z.Ijanovtyń urpaqtary, stýdentter men magıstranttar, Nur-Sultan qalasynda turatyn zıaly qaýym ókilderi, Qazaqstannyń «Aq jol» demokratıalyq partıasynyń basshylary jáne buqaralyq aqparat quraldarynyń ókilderi qatysty.

Atalmysh shara tizginin EUÝ-dyń áleýmettik-mádenı damý jónindegi prorektory, QR UǴA akademıgi Dıhan Qamzabekuly júrgizip otyrdy.

-İzdeýshisi joq bolsa, kóp nárse umyt qalady. Artynda qalǵan materıaldardy jınaqtap, urpaqtary 10 tomdyq kitap qylyp shyǵaryp, oqyrman qaýymnyń ıgiligine usynyp otyr. Bul úlken eńbek. Osydan eki jyl buryn tórt tomdyq kitabynyń tusaýkeser rásimine kýá bolǵanym bar,-dedi Dıhan Qamzabekuly.

Sodan keıin qatysýshylar marqum Zıada Ijanulynyń ómiri men shyǵarmashylyǵyna arnalǵan «Muraǵat isiniń maıtalmany» atty derekti fılmdi tamashalaǵan kópshilik 10 tomdyq kitaptyń tusaýkeser rásimine kýá boldy.

Tusakeser rásimge «Aq jol» demokratıalyq partıasynyń tóraǵasy Azat Perýashev, eltańba avtory Jandarbek Málibekov, QR UǴA akademıgi Rahmetqajy Bersimbaev, fılolog-ǵalym Shákir Ybyraev, aqyn, «Aq jol» demokratıalyq partıasy tóraǵasynyń orynbasary Qazybek Isa jáne marqumnyń aǵaıyn-týystary qatysyp, Zıada Ijanovtyń shyǵarmashylyǵy týraly keńinen áńgimeler qozǵady.

-Biz búgin eldiń tarıhy týraly mol maǵlumat beretin qundy eńbekterdiń tusaýyn kesip otyrmyz. Baıqaǵanym, marqumnyń qujatqa muqıattyǵy keremet bolǵan. Bul 10 tomdyq tarıhshy-zertteýshilerge azyq bolady degen oıdamyn. Eń bastysy, kitap ǵylymnyń aınalysyna tústi, osyndaı eńbekke mol ter tókken shyǵarmashyl topqa jáne uıymdastyrýshylarǵa rızamyn, - dedi kórnekti ǵalym Shákir Ybyraev.

Sharada sóz alǵan zıaly qaýym ókilderi Zıada aǵanyń respýblıka úshin sińirgen eńbegi men Abaı Qunanbaevtyń qoltańbasyn tapqanyn erekshe atap ótti. Ásirese uly aqynnyń 175 jyldyǵynda Abaıdyń óz qoly mereıtoılyq tańbada turýy kerek degen de oılar aıtyldy.

Sonymen qatar, jınalǵan kópshilik osyndaı qundy eńbekti qoljetimdi qylyp, halyqqa syılap otyrǵan balalaryna alǵys bildirýdi de umytqan joq.

Shara barysynda tusaýy kesilgen kitaptardyń bir parasy tarıhshy ǵalymdar men EUÝ kitaphanasyna syıǵa tartyldy.