2 qyrkúıekte Beıjiń qalasynda Memleket basshysy Qasym-Jomart Toqaevtyń qatysýymen Qazaq-Qytaı iskerlik keńesiniń VIII otyrysy ótti.

İs-sharaǵa Mańǵystaý oblysy ákiminiń orynbasary Erbol İzbergenov bastaǵan óńirlik delegasıa qatysty. Sapar nátıjesinde oblys ákimdigi men Qytaıdyń jetekshi kompanıalary arasynda óńir ekonomıkasy úshin mańyzdy ınvestısıalyq jobalardy júzege asyrý jóninde kelisimderge qol qoıyldy.

Atap aıtqanda, «Zhongyun International Industrial Co., Ltd. (Heilongjiang)», «Inner Mongolia Guoyou Import & Export Trading Co., Ltd.» jáne «Tianjin Guoyou WuChan Group Co., Ltd.» kompanıalary – Mańǵystaý oblysynda teńiz portyn salý jáne kólik-logıstıkalyq ınfraqurylymdy damytý jobasyn, «Gansu Joy Sturgeon Ecological Technology Co., Ltd.» kompanıasy – balyq sharýashylyǵy, balyq óńdeý jáne týrızm baǵytynda birqatar jobalardy iske asyrady.

Budan bólek, «ChengLi Special Automobile Co., Ltd.» jáne «Hua An International Investment Management LLP» – arnaıy tehnıkany avtojınaqtaý zaýytyn salýdy kózdese, «Huawei Technologies Kazakhstan» kompanıasymen sıfrlandyrý salasyndaǵy birlesken jobalar qolǵa alynady.

Aıta keteıik, oblys ákimi Nurdáýlet Qılybaı óńirge ınvestısıa tartý maqsatynda atalǵan kompanıalardyń ókilderimen birneshe kezdesý ótkizgen bolatyn. Kelissózder Aqtaý, Astana, sondaı-aq Qytaıdyń Beıjiń, Tánszın jáne Sýıchjoý qalalarynda uıymdastyryldy. Kezdesýler barysynda taraptar birlesken jobalardy talqylap, ózara yntymaqtastyqty nyǵaıtý jóninde ýaǵdalasqan edi.

Osy maqsatty kelissózderdiń nátıjesinde búgin Beıjiń qalasynda Memleket basshysynyń qatysýymen ótken iskerlik keńeste, qytaılyq iri kompanıalarmen kelisimderge qol qoıyldy. Bul kelisimder Mańǵystaý oblysyna qomaqty ınvestısıa tartýǵa jol ashady.

Mańǵystaý oblysy ákiminiń baspasóz qyzmeti