17 mamyr kúni Á. Tuıaqov atyndaǵy ortalyq stadıonda Jańaózen qalasynda alǵash ret Uly Jeńistiń 80 jyldyǵyna arnalǵan dzúdo, grek-rım jáne erkin kúres boıynsha respýblıkalyq sport festıvali ótti.
Aýqymdy sporttyq is-sharaǵa elimizdiń 12 oblysynan 600-den astam sportshy qatysyp, úsh sport túrinen – dzúdo, grek-rım jáne erkin kúresten ózara baq synady.
Ashylý saltanatyna Mańǵystaý oblystyq máslıhatynyń tóraǵasy Jańbyrbaı Mataev arnaıy qatysyp, tarıhı mereıtoıdyń mán-mańyzyna toqtalyp, sportshylarǵa sáttilik tiledi. Sonymen qatar, ol mundaı deńgeıdegi sporttyq festıváldiń alǵash ret Jańaózen qalasynda ótip otyrǵanyn erekshe atap ótti.
Qala ákimi Janseıit Qaınarbaev respýblıkalyq deńgeıdegi sporttyq is-sharanyń Jańaózende ótýi – qalanyń áleýmettik-sporttyq áleýetiniń artqanyn jáne sportqa degen qoldaýdyń kúsheıgenin kórsete túsetinin aıtty.
Festıvál qorytyndysy boıynsha úzdik komandalar men sportshylar anyqtalyp, júldeli oryndarǵa ıe bolǵandarǵa medaldar men kýboktar tabystaldy.
Sonymen qatar, Uly Otan soǵysy ardagerlerine qurmet kórsetildi.
Jańaózen qalasynyń ákimdigi festıválge qatysqan barlyq sportshylar men bapkerlerge alǵys bildire otyryp, bolashaqta da osyndaı aýqymdy sporttyq is-sharalardy dástúrli túrde ótkizý josparlanyp otyrǵanyn habarlaıdy.
