Búgin, 5 tamyz kúni Aqtaý qalasynda oblys ákimi Nurdáýlet Qılybaıdyń qatysýymen «QHA 30 jyl: birlik pen kelisim» atty Qazaqstan halqy Assambleıasy etnomedıatorlarynyń respýblıkalyq forýmy ótti.
Aýqymdy is-sharaǵa Qazaqstan halqy Assambleıasy tóraǵasynyń orynbasary – QR Prezıdenti ákimshiligi QHA hatshylyǵynyń meńgerýshisi Marat Ázilhanov sondaı-aq, respýblıkalyq jáne óńirlik etnomedıasıa ortalyqtarynyń jetekshileri, elimizdiń ár óńirinen kelgen delegattar, etnomedıatorlar, aqsaqaldar men analar keńesiniń músheleri, úkimettik emes uıym ókilderi men máslıhat depýtattary, jergilikti memlekettik organ ókilderi qatysty.
Aýqymdy shara Prezıdent Qasym-Jomart Toqaevtyń: «Qazaqstan Respýblıkasynyń Mádenıet jáne aqparat, İshki ister, Ádilet mınıstrlikteri múddeli memlekettik organdarmen, Astana, Almaty, Shymkent qalalarynyń jáne oblystardyń ákimderimen birlesip, Qazaqstan halqy Assambleıasynyń etnomedıasıa salasyndaǵy jumysyna jan-jaqty qoldaý kórsetsin, «Eldesý jáne tatýlasý» jobasynyń aýqymyn keńeıtsin»,-degen tapsyrmasy aıasynda ótti.
Forým barysynda etnomedıasıa salasyndaǵy birqatar mańyzdy taqyryptar talqylandy. Atap aıtqanda, óńirlerdegi etnomedıasıa ınstıtýtynyń damý tájirıbesi, etnosaralyq qatynastardy retteýdegi tıimdi ádister men praktıkalyq keıster, etnomedıatorlardyń kásibı daıarlyǵy men oqytý baǵdarlamalarynyń róli sóz boldy.
Sonymen qatar, qatysýshylar etnosaralyq janjaldardyń aldyn alý algorıtmderi, qoǵammen konstrýktıvti ózara is-qımyl jasaý joldary, halyqaralyq tájirıbeler jáne elimizde medıasıany damytýǵa arnalǵan negizgi tásilder boıynsha pikir almasty.
Jıyn barysynda oblys ákimi Nurdáýlet Qılybaı eldiń damýy men qoǵamnyń durys baǵytta ilgerileýi aýyzbirshilik pen birlik bolǵan jaǵdaıda ǵana múmkin ekenin atap ótti.
- Memleket basshysy Qasym-Jomart Toqaevtyń BUU Bas hatshysy Antonıý Gýterrıshpen kezdesýinde Bas hatshy Qazaqstandaǵy etnosaralyq tatýlyq pen qoǵamdyq aýyzbirshilikke joǵary baǵa berip ketti. Biz bir-birimizge qoldaý kórsetip, ortaq maqsatqa jumylsaq qana óńirimizdiń, elimizdiń áleýetin arttyra alamyz. Aýyzbirshilik pen ózara túsinistik bar jerde ǵana nátıje de, damý da bolady. Sondyqtan yntymaǵymyzdy bekemdep, ony barynsha damytýymyz kerek,” – dedi óńir basshysy.
Forýmnyń sońynda birqatar azamattar Qazaqstan halqy Assambleıasynyń arnaıy marapattaryna ıe boldy. Etnosaralyq tatýlyq pen qoǵamdyq kelisimdi nyǵaıtýǵa qosqan úlesi úshin qatysýshylarǵa «Alǵys» medali men merekelik alǵys hattar tabystaldy.
Mańǵystaý oblysy ákiminiń baspasóz qyzmeti
