Memleket basshysy Qasym-Jomart Toqaev óńirge otandyq jáne sheteldik ınvestorlardy kóptep tartý úshin «Aqtaý teńiz porty» AEA áleýetin damytýdy tapsyrǵan bolatyn. Osy baǵytta oblys ákimdigine Úkimetpen birlese otyryp ekonomıkalyq aımaqtyń aýmaǵyn jáne basym qyzmet túrleriniń tizbesin keńeıtý jóninde normatıvtik-quqyqtyq aktiler qabyldaýdy qamtamasyz etý júktelgen edi. Bul baǵytta Mańǵystaý oblysy ákiminiń bastamasymen keshendi jumystar júrgizildi, dep habarlaıdy Qoǵamdyq komýnıkasıa ortalyǵy.
2024–2025 jyldary ekonomıkalyq aımaqtyń aýmaǵy eki jarym ese ıaǵnı 1926 gektardan 4407 gektarǵa deıin ulǵaıdy. Onyń quramyna bıyl Aqtaý halyqaralyq áýejaıy, Aqtaý qalasynyń jaǵalaý bóligi, Jańaózenniń óndiristik aımaǵy jáne Sarja teńiz termınaly kirdi.
-Aldaǵy ýaqytta «Aqtaý teńiz porty» AEA aýmaǵy taǵy da ósedi. Munaıly aýdanynan ınvestısıalyq jobalardy iske qosý úshin arnaıy jerdi, KaspııERSAI keme jasaý zaýytyn, Kendirli kýrorttyq aımaǵyn ekonomıkalyq aımaqqa kirgizý jumystary bastalyp ketti. Osy aýmaqtar qosylǵan jaǵdaıda AEA kólemi shamamen 21 myń gektarǵa jetedi. Bul óńir qazynasyna jańa ınvestısıalardyń quıylýymen jańa salalardyń damýyna úlken múmkindik beredi,-dedi «Aqtaý teńiz porty» AEA» AQ basqarma tóraǵasy Múbárak Tólegenov.
«Aqtaý teńiz porty» AEA taǵy bir jasalǵan mańyzdy qadam – basym qyzmet túrleriniń tizimi keńeıtilip, burynǵy 24 baǵyttyń ornyna 45 jańabaǵyt bekitildi. Olardyń qatarynda: qurylys, abattandyrý, týrızm, sanatorly-kýrorttyq qyzmetteri, toqyma buıymdary óndirisi, sý óńdeý, keme jáne áýe kemelerin jóndeý, kólik jáne basqa daóndiris túrleri bar.
«Aqtaý teńiz porty» arnaıy ekonomıkalyq aımaǵy 2002 jyly Prezıdent Jarlyǵymen qurylǵan bolatyn. Sol ýaqyttan beri ol Mańǵystaý oblysynyń ósip-órkendeýiniń mańyzdy ortalyǵyna, Ortalyq Azıany álemdik naryqtarmen baılanystyratyn senimdi kópirine aınaldy.
2024 jyly oblys ákimdiginiń bastamasymen jáne Úkimettiń qoldaýymen ekonomıkalyq aımaqtyń qyzmet etý merzimi 2052 jyldyń 31 jeltoqsanyna deıin uzartyldy. Bul aldaǵy ondaǵan jyldarǵa úlken josparlardy júzege asyrýǵa zor múmkindik beredi.
Arnaıy ekonomıkalyq aımaqtyń artyqshylyǵy onyń kásipkerlerge kóp jeńildik jasaýynda. Aımaqta óz jobasyn júzege asyrǵan ınvestor korporatıvtik tabys, múlik jáne jer salyǵy men ımport QQS-tan, kedendik bajdardan bosatylady. Jobalarǵa tolyq ákimshilik jáne tehnıkalyq qoldaý kórsetiledi.
Búginde ekonomıkalyq aımaqta otandyq kásipkerlerden ózge Italıa, Túrkıa, Germanıa, Ázerbaıjan, Qytaı jáne Sıngapýr kompanıalary óndiris ashyp, jobalaryn sátti júzege asyrýda.
