Qalalyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Sádýaqas Baıǵabylov elordalyq saýda jelilerinde satylatyn lımonad ónimderinde natrıı benzoaty shekten tys kóp ekenin aıtty. Bul týraly departamenttiń baspasóz qyzmetine silteme jasap, Qamshy.kz aqparat agenttigi habarlaıdy.

Satylatyn tamaq ónimderiniń qaýipsizdigin baqylaý aıasynda departament ýlanýdyń aldyn alý maqsatynda turaqty túrde taratý jelisinen azyq-túlik jáne azyq-túlikke jatpaıtyn taýarlardy iriktep alady.

""Grýzın syra kompanıasy" AQ óndirgen alkogólsiz, gazdalǵan "ARAGVI" lımonady, tarhýn jáne saperavı sýsyndarynyń quramynda natrıı benzoatynyń gıgıenalyq normadan asatyny anyqtaldy. Zerthanalyq zertteý nátıjesi boıynsha osy alkogólsiz sýsyndardaǵy natrıı benzoatynyń mólsheri – 152,68 mg/kg-nan 163,53 mg/kg deıin. Al norma –150 mg/kg" – dep, jazylǵan baıandamada.

Mamandardyń aıtýynsha, natrıı benzoaty (E211)  – taǵamdyq qospa. Saqtaý merzimi men saqtaý merzimin ulǵaıtý maqsatynda taǵamdyq jáne azyq-túlikke jatpaıtyn ónimderdi, sonyń ishinde tátti gazdalǵan sýsyndardy óndirýde qoldanylatyn konservanttar tobyna jatady.

"Natrıı benzoaty askorbın qyshqylymen árekettesip, DNQ qurylymyn buzatyn kanserogendi benzol túzetinin jáne de baýyr sırrozy men qaterli isik aýrýyna, júıke júıesiniń buzylýyna sebep bolatynyn este ustaǵan abzal. Teri sezimtaldyǵymen nemese astma aýrýymen aýyratyn adamdarda E211 konservanttary aýrýdy órshitip, alergıalyq reaksıa týǵyzýy múmkin. Qazirgi ýaqytta zań aıasynda saýda jelisin tekserý, anyqtalǵan qaýipti ónimderdi naryqtan shyǵarý jáne ákimshilik jaýapkershilikke tartý boıynsha sharalar qabyldanýda" – dep departament málim etti.