Jaqynda ǵana partıa quratynyn aıtyp, partıasynyń atyn "Sen Alash" dep jarıalaǵan kásipker, medıatrener Ahmetbek Nursılanyń aıtýynsha, parlament saılaýy merziminen buryn ótýi de, óz ýaqytynda bolýy da múmkin. Bul týraly kásipker Qamshy tilshisine telefon arqyly bildirgen pikirinde aıtty.
– Men "bolady, ne bolmaıdy" degen boljamdy onsha jaqsy kórmeımin. Parlament saılaýy merziminen buryn ótýi de múmkin nemese óziniń ýaqytynda ótýi de yqtımal. Toqaev kóptegen reformalar jasap jatyr. Prezıdentke óziniń reformasyn qoldaıtyn adamdar kóbirek kerek dep oılaımyn. Qazirgi parlamenttegi adamdar prezıdenttiń reformalaryn tolyqtaı qoldaı bermeýi múmkin. Sol úshin jańa qan quıylyp, jańa quram kelýi kerek dep esepteımin, – deıdi kásipker.
Partıanyń yntaly tobyn tirkeýge qajetti myń adamnyń daıyn turǵanyn aıtqan medıatrener olardy tirkeýmen aınalysýdy bastap jatqanyn jetkizdi.
– Myń adamnyń tizimi, aty-jónimen daıyn tur. Tizimderin durystap jatyrmyz, – dedi ol.
Ahmetbek Nursılanyń sózinshe, ádette barlyq partıalardyń baǵdarlamalary uqsas keledi.
– Partıalardyń kóbi ádiletti saılaý júıesin qurý, ádiletti sot degen baǵytty aıtady. Al meniń baǵdarlamamdaǵy basym baǵyt – eldi ındýstrıalandyrý, eldiń bilim berý júıesine reforma jasaý jáne ekonomıkany kóterý. Eldegi jemqorlyqty joımaıynsha, eldiń ekonomıkasy kóterilmeıdi. Úlken kedergi – osy, – deıdi kásipker.
Túrli kanaldar ashyp, Qazaqstan ekonomıkasy jaıynda dáris oqyp júrgenin aıtqan Ahmetbek Nursıla "Qazaqstan ekonomıkasy búgin nege osyndaı jaǵdaıda, oǵan ne sebep jáne odan shyǵýdyń joly qandaı?" degen taqyryptarǵa jaýap beretinin málimdedi.
– Men eger parlamentke barsam, osy arqyly durys ekonomıkalyq damý modelin usynatyn bolamyn, – deıdi medıatrener.