6 shilde – Qazaqstandy 30 jylǵa jýyq úzdiksiz bılep, byltyr naýryz aıynda óz erkimen prezıdenttikten ketken Nursultan Nazarbaevtyń týǵan kúni. Ol búgin 80 jasqa tolyp otyr. Nazarbaevtyń týǵan kúni byltyr óziniń esimi berilgen el astanasy Nur-Sultan qalasynyń kúnimen tuspa-tus.
Sońǵy jyldary Qazaqstanda azamattardyń qarsylyǵyna qaramastan, Nazarbaevqa eskertkishter qoıylyp, onyń esimi kóshege, vokzalǵa, saıabaqqa, mektepke berile bastady. Keıbir sarapshylar buny "jeke basqa tabyný" dep esepteıdi. Al bılikshil kózqarastaǵy adamdardyń oıynsha, bul – Nazarbaevqa kórsetilgen qurmet. Qamshy tilshisi ınternettegi málimetterdi negizge ala otyryp, Qazaqstanda jáne shetelderde Nazarbaevtyń aty berilgen kósheler men nysandarǵa sholý jasady.
NAZARBAEVTY QAZAQSTANNAN TYS JERLERDE DÁRİPTEÝ
Álemniń birneshe memleketinde Qazaqstannyń eks-prezıdentiniń atynda kóshe bar. Eń alǵash 2007 jyly Reseıdiń quramyndaǵy Sheshen Respýblıkasynyń astanasy Groznyı qalasyndaǵy ortalyq kóshelerdiń birine Nazarbaevtyń aty berilgen. Keıin 2010 jyly dál osy Groznyı qalasyndaǵy mektepterdiń biri de Nazarbaevtyń esimimen ataldy. Budan bólek, Reseıdegi Qazan (Tatarstan astanasy) jáne Magas (Ingýshetıa astanasy) qalasynda Nazarbaev atyndaǵy kóshe bar.
Groznyı qalasyndaǵy Nazarbaev atyndaǵy mektep
Qazaqstannyń eks-prezıdentine Reseıden basqa da postkeńestik elderdiń birnesheýi kóshe berip, monýment qoıǵan. Olardyń qatarynda Armenıa, Qyrǵyzstan jáne Ýkraına bar.
Armenıada Nazarbaevtyń atynda kóshe bolsa, Qyrǵyzstanda oǵan 2005 jyly úlken eskertkish qoıyldy. Al Ýkraınanyń Dneprodzerjınsk qalasynda prezıdent Nazarbaev oqyǵan kásiptik kolejde 2011 jyly Nazarbaev mýzeıi ashylyp, prezıdenttiń músini ornatylǵan.
Qazaqstanmen baýyrlas el bop sanalatyn Túrkıada Nazarbaevqa degen qurmet erekshe. Internettegi aqparatqa saı, qazir bul elde Nazarbaev atyndaǵy tórt kóshe jáne úlken bir eskertkish bar.
Iordanıa astanasy Ammanda da Nazarbaevqa bir kóshe berilgen.
Túrkıada Nazarbaevqa qoıylǵan eskertkish
NUR-SULTANDAǴY NURSULTAN NAZARBAEV
Nazarbaev esimimen baılanysty nysandardyń kóp bóligi Qazaqstannyń astanasynda.
Bul qalada onyń atyndaǵy nysandar 2000 jyldan beri paıda bola bastady. Eń alǵash Nazarbaev esimi berilgen nysandar qatarynda prezıdent arhıvi men kitaphanasy tur. Olardan bólek, el astanasynda tuńǵysh prezıdent murajaıy men Nazarbaev ýnıversıteti bar.
Qaladaǵy temir jol vokzaly men áýejaı da Nazarbaevtyń atynda.
Qazaqstannyń iri qalalarynyń bárinde jumys istep jatqan "Nazarbaev zıatkerlik mektepteriniń" alǵashqysy da dál osy el astanasynda ashylǵan.
Nazarbaev 2019 jyly óz erkimen prezıdenttikten ketkenniń ertesinde-aq onyń atyndaǵy nysandar kóbeıe bastady. Ol kete sala ornyna kelgen sol kezdegi senat spıkeri Qasym-Jomart Toqaev halyqtyń pikirin tyńdamastan, Astana qalasyn Nur-Sultan dep ózgertti. Buǵan qosa, Toqaev barlyq oblys ortalyqtaryndaǵy ortalyq kóshelerdiń birin Nazarbaevtyń atyna ózgertý týraly buıryq berdi.
80 jyldyǵy qarsańynda el astanasynda Nazarbaevtyń aty berilgen taǵy bir eskertkish boı kóterdi. Ol eskertkish Ulttyq qorǵanys ýnıversıtetiniń aldyna qoıyldy. Bul ýnıversıtet te Nazarbaevtyń atynda.
80 jyldyǵy qarsańynda Nazarbaevqa qoıylǵan eskertkish
Almatyda 2010 jyly birinshi prezıdent saıabaǵy ashyldy. Al 2011 jyly saıabaqqa onyń úlken eskertkishi ornatyldy.
Tuńǵysh prezıdent atyndaǵy saıabaq Taraz, Qyzylorda jáne Aqtóbe qalasynda da bar.
Eks-prezıdent týraly osy ýaqytqa deıin kóptegen fılmder túsirilip, kitaptar jazyldy. Elde oǵan óleń shyǵarǵan aqyndar da, án arnaǵan kompozıtorlar da kóp.
Pikir qaldyrý