Búgin Almatyda «Damý» kásipkerlikti damytý qorynan sýbsıdıa alyp, kásibin júrgizip otyrǵan kompanıalardyń óndiris oryndaryna baspasózge arnalǵan týr uıymdastyryldy.
«Damý» qory Almaty qalalyq fılıalynyń dırektory Svetlana Nazarúk el úkimeti kásipkerlikti qoldaýǵa arnalǵan memlekettik baǵdarlamalarǵa ózgeris engizip jatqanyn málim etti.
– Bıznestiń jol kartasy – 2025 memlekettik baǵdarlamasyna engizilgen ózgeriske saı, monoqala, shaǵyn qala jáne aýyldyq eldimekendegi kásipkerlerdiń bıznes-bastamalaryn qoldaý baǵyty qysqartyldy. Endi baǵdarlama kásipkerlerge portfeldik sýbsıdıalaý túrindegi qarjylaı qoldaý sharalaryn jasaıdy. Ol boıynsha ınvestısıalyq maqsattaǵy kredıttiń maksımaldyq somasy – 20 mln teńge. Qural-jabdyq satyp alýǵa 5 mln teńgege deıin qarjy beriledi. Syıaqy mólsherlemesin taǵaıyndaý barysynda ulttyq banktiń 8,5 paıyz kólemindegi mólsherlemesi qosa esepteledi. Boryshker tek 6 paıyzben tóleıdi. Investısıalyq jobalarǵa alynǵan qarajatty 3 jylǵa deıin, qural-jabdyq qarjysyn 2 jylǵa deıingi merzimde qaıtarý kerek. Baǵdarlama aıasynda Damý qorynan 85 paıyz kepildik beriledi. Portfeldik kepildendirý men sýbsıdıalaý boıynsha nesıe berý máselesin ekinshi deńgeıli bankter men shaǵynqarjylyq uıymdar sheshedi. Búginde Sberbank Reseı, Halyq bank, ATF bank, Nurbank, Álfa bank, Bank SentrKredıt, Islam banki, ál-Hılál banki, RBK bank sekildi qarjylyq uıymdarmen kelisim jasalǵan, – dedi Svetlana Nazarúk.
Onyń aıtýynsha, ekinshi baǵyttaǵy ózgeristerge saı, iri kásipkerliktiń yqtımaldy salalarynyń tizimi keńeıgen. Sondaı-aq ózge bankterden, lızıńtik kompanıalardan alynǵan merzimi 8 jyldan aspaǵan kredıtterdi qaıta qarjylandyrý múmkindigi týǵan.
Bıznestiń jol kartasy baǵdarlamasy boıynsha Almatynyń 2020 jylǵy búdjeti 9,7 mlrd teńgeni quraıdy.
– Qazirgi tańda Almaty Bıznestiń jol kartasy – 2020 baǵdarlamasy aıasyndaǵy qoldaý jáne sýbsıdıalaý men kepildendirý boıynsha kósh bastap tur. Jyl basynan bergi 9 aıda 59 mlrd teńge somaǵa 168 sýbsıdıalaý kelisim-sharty jasaldy. Ósim 2019 jylǵy 3 toqsanmen salystyrǵanda 39 paıyzdy qurady. Kredıttiń jalpy somasy 11,5 mlrd teńge bolatyn 139 joba 3,8 mlrd teńgege kepildendirildi. «Basym jobalar mehanızmi» baǵdarlamasynyń qarjylandyrylýy arttyrylyp, 1 trln teńgege deıin jetti. Baǵdarlamaǵa enetin taýarlar tizimi artty. 3-ten 5 mlrd teńgege deıin kredıt alynǵanda kepildendirý kólemi 30 paıyz bolady. Tótenshe jaǵdaı rejımi «Damý» qory arqyly memlekettik qoldaý alýǵa esh kedergi keltirmegenin aıta ketken jón. Sýbsıdıalaý men kepildendirý boıynsha ótinimder onlaın túrde Egov, Onlaın Damý portaldary arqyly júrgiziledi, – dedi «Damý» qory Almaty qalalyq fılıalynyń dırektory.
2020 jyly qor tarapynan Almaty qalasyndaǵy kásiporyndarǵa 221 joba boıynsha nesıeniń jalpy somasy 191 mlrd teńgege paıyzdyq mólsherlemeni sýbsıdıalaý túrinde qarjylyq qoldaý kórsetilgen.
«Damý» qorynyń qarjylyq qoldaýyna ıe bolǵan jas kompanıalardyń biri – «Astro Engineering». Kompanıa 2018 jyldan beri TCL saýda markasynyń teledıdarlaryn qurastyrýmen aınalysady. Kompanıa zaýytynda teledıdarlar qurastyrylyp, olardyń baǵdarlamasy ornatyrylady. «Astro Engineering» ónimi búginde Almaty qalasyndaǵy turmystyq tehnıka satatyn barlyq iri jelilerde usynylǵan.
– Bıyl kompanıa «Damý-Óndiris» baǵdarlamasy boıynsha memlekettik qoldaýǵa ıe boldy. Qajetti shıkizatty satyp alýǵa «Qazaqstan Halyq Banki» arqyly 600 mln teńge jeńildetilgen nesıe aldyq. Qaryzdyń mólsherlemesi jyldyq 6 paıyzdy quraıdy, – deıdi ónerkásip dırektory Valerıı Son.
Onyń sózinshe, TCL brendi teledıdar satýdan álemde 2-orynǵa shyqqan. Almatydaǵy zaýytta óndiriletin ónim ázirge tek Qazaqstan aýmaǵyna taralady. Jaqyn keleshekte taýardy eksporttaý josparlanyp otyr. Kompanıanyń bıylǵy mejesi – jyl sońyna deıin 50 myńnan astam teledıdar óndirý. Kásiporynda 80-ge jýyq adam jumys isteıdi.
«Damý» qorynan qoldaý alǵan kelesi kompanıa – káriz qubyrlary men tereze profılderin óndiretin «Novus Polymer» jaýapkershiligi shekteýli seriktestigi. Kompanıa naryqta 12 jyldan beri jumys istep keledi. Jylyna 30 myń tonna ónim óndirýge qaýqarly. Kompanıa 300 adamdy jumyspen qamtyp otyr. Onyń 97 paıyzy – Qazaqstan azamattary.
– Bizdiń kásiporyn «Damý-Óndiris» baǵdarlamasynyń qatysýshysy. Sonyń arqasynda «Qazaqstan Halyq banki» arqyly 300 mln teńge somasyna nesıe aldy. Atalǵan qoldaý kompanıanyń aınalymdyq qarajatyn toltyrýǵa múmkindik berdi, – dep atap ótti kompanıa dırektory Engın Shemshek.
Kompanıa osy kúnge deıin Qazaqstan ekonomıkasyna 50 mln dollardan astam ınvestısıa quıǵan. Kompanıa basshysynyń sózinshe, «Novus Polymer»-diń Qazaqstannyń barlyq iri qalalarynda resmı dılerleri bar. Sondaı-aq ónim Qyrǵyzstanǵa, Tájikstanǵa, Ózbekstanǵa jáne Aýǵanstanǵa eksporttalady.
«Damý qory arqyly kásipkerliktiń túrli salalary jeńildetilgen nesıe alyp otyr. Solardyń qataryna «Suńqar» emdeý-dıagnostıkalyq ortalyǵy da enedi.
Ortalyq medısınalyq qyzmet kórsetý naryǵynda 2007 jyldan beri jumys isteıdi. Bıznesti qoldaýdyń memlekettik baǵdarlamasy aıasynda jabdyqtar satyp alýǵa jeńildikpen nesıe alǵan.
– «Bıznestiń jol kartasy 2020» baǵdarlamasy sheńberinde bizdiń kompanıa ekinshi deńgeıli bankten 14% jyldyq mólsherleme boıynsha 550 mln teńge somasyna nesıe aldy. Onyń 8,4%-yn «Damý» qory sýbsıdıalaıdy. Nesıege alǵan qarajatqa kompanıa MRT jáne KT apparattaryn satyp aldy. «Damý» qory kompanıany 5 jyldan beri qoldap keledi, – dedi «Suńqar» emdeý-dıagnostıkalyq ortalyǵy dırektorynyń orynbasary Qýanysh Kerimqulov.
Onyń sózinshe, ortalyqta el boıynsha 5 myńǵa tarta adam jumys isteıdi.
Pikir qaldyrý