Qazaqstan Respýblıkasy Qarjy mınıstrligi 2025 jylǵy 1 qyrkúıek jaǵdaıyndaǵy respýblıkalyq búdjetten óńirlerge baǵyttalǵan nysanaly transfertterdiń ıgerilý deńgeıi týraly aqparat jarıalady.
Nysanaly transfert – respýblıkalyq búdjetten jergilikti búdjetke naqty bir maqsatty júzege asyrý úshin beriletin qarajat. Nysanaly transfert kólemi jyl saıyn aldaǵy úshjyldyq búdjettik kezeńdi qamtıtyn «Respýblıkalyq búdjet týraly» Zańymen bekitiledi.
2025 jyldyń 1 qyrkúıegindegi jaǵdaı boıynsha respýblıkalyq búdjetten aımaqtarǵa jalpy quny 1,056 trln teńgeni quraıtyn nysanaly transfert jiberilgen. Onyń ıgerilý kólemi 99,7 paıyzdy quraıdy (1,053 trln teńge).
Nysanaly transfert baǵyttary boıynsha baǵdarlamalyq damýdy (666,7 mlrd teńge), aǵymdaǵy baǵdarlamalardy iske asyrýdy (351,1 mlrd teńge) jáne nesıeleýdi (59 mlrd teńge) kózdeıdi.
Endi osy 1 trln teńgeden astam qarajattyń 40 paıyz kólemin tek Astana qalasy, Almaty jáne Túrkistan oblystary alyp otyr. Mysaly, aımaqtyq bólinis kestesine nazar aýdarsaq, jańadan qurylǵan Abaı oblysy (27 mlrd teńge) men Ulytaý oblysy (7 mlrd teńge) ǵana alypty nysanaly transfert arqyly. Al ózin-ózi qamtamasyz etetin Almaty (68 mlrd teńge) jáne Shymkent (51 mlrd teńge) kesteniń orta tusyna oryn tepken.
Árıne, saýatty adam retinde biz kósh bastap turǵan aımaqtarda damýdyń oń dınamıkasy turaqty qalyptasyp otyrǵanyn jáne sol damý qarqynyn qoldaý qajet ekenin túsinemiz. Alaıda, jańadan qurylǵan aımaqtarda baǵdarlamalardyń júzege asýyn respýblıkalyq búdjetten qoldaý qajettiligi de kúıip turǵany belgili ǵoı. Astana qalasyna talas bolmaıdy: halyq sany joǵary qarqynmen ósip kele jatqan elordany turaqty damytý – strategıalyq mańyzy bar jumys.
Nemese ekinshi suraq týady: jergilikti atqarýshy organdardan tıisti usynystar az bolyp otyr ma? Olaı bolatyn bolsa, bul – óńir ákimderiniń tikeleı eńbek kórsetkishiniń biri. Respýblıkalyq búdjetten bólinetin nysanaly transferttiń nysanasyndaǵy teńgerim jaǵdaıyn da oılaý kerek.
