Shymkent qalalyq «Nur Otan» fılıalynyń kezekten tys konferensıasy kezinde Máslıhattyń partıalyq tizimi ázirlenip, Parlament Májilisiniń partıalyq tizimine úmitkerler anyqtaldy. Sonymen qatar, qalalyq saılaýaldy baǵdarlamasy da bekitilip, partıanyń HH sezine qatysýǵa delegattar saılandy.

Taldaý kórsetkendeı, tizimdegi áıelderdiń úles sany 3 ese artty – 11-den 30% -ke deıin, al 35 jasqa deıingi jastar - 0-den 20% -ǵa deıin . Úmitkerlerdiń ortasha jasy 49-dan 44 jasqa deıin tómendedi. Qyzmettegi depýtattardyń ishinen 8 adam ǵana jańa tizimge engizilgen.

Tizimdegilerdiń kópshiligi – shaǵyn jáne orta bıznes ókilderi – 30%, bilim salasy – 17%, úkimettik emes uıymdar – 12% jáne t.b.

Konferensıa barysynda Májilistegi partıalyq tizimge úmitkerler arasynda pikirsaıystar ótti. 8 úmitkerdiń ishinen partıalyqtar «Praımerız» aqparattyq júıesi arqyly qalalyq ókildik kvotasyna sáıkes 4 úmitkerdi tańdady.

Parlamenttiń tómengi palatasynyń qyzmettegi depýtaty Berik Ospanov, qalalyq máslıhattyń hatshysy Ǵanı Tashqaraev, kásipodaq tóraǵasy Berik Bekjanov jáne mektep-ınternat dırektory Jadyra Tańatarova eń kóp daýys jınady.

Fılıal tóraǵasy, qala ákimi Murat Áıtenovtiń aıtýynsha, praımerız kezinde turǵyndardan túsken 685 usynystyń 98% Shymkent qalasynyń saılaýaldy baǵdarlamasynda kórinis tapty.

«Halyqtyń negizgi máselelerin eskere otyryp, biz qalanyń ekonomıkalyq jáne áleýmettik damýyna qajetti 10 basymdyqty belgiledik. Qala turǵyndarynyń qoldaýymen baǵdarlamanyń tolyq júzege asatynyna senimdimin», – dedi ol.

Eske sala keteıik, budan buryn «Nur Otan» partıasy aımaqtyq fılıaldardyń konferensıalar kestesin jarıalaǵan bolatyn, onyń barysynda barlyq deńgeıdegi máslıhattarǵa jáne ár óńirden Májilistiń partıalyq tizimine úmitkerler anyqtalatyn bolady.

Sonymen, 11 qarashada Almaty qalasynda, 12 qarashada Nur-Sultan qalasynda, 16 qarashada Almaty, Qaraǵandy jáne Qyzylorda oblystarynda, 17 qarashada Aqmola, Shyǵys Qazaqstan, Jambyl, Batys Qazaqstan, Túrkistan, Atyraý, Qostanaı, Mańǵystaý, Pavlodar jáne Soltústik Qazaqstan oblystarynda konferensıa ótedi.
Qalalyq jáne oblystyq konferensıalardaǵy úmitkerler arasyndaǵy debattar ekinshi deńgeıdegi praımerız sheńberinde ótip jatqanyn atap ótken jón.

Partıalyq ishki irikteýdiń birinshi kezeńine 10 myń kandıdat qatysty. Onyń 37% - áıelder, 29% - 35 jasqa deıingi jastar. Eger bastaýysh partıa uıymdarynan kandıdattardyń 30%- usynylǵan bolsa, 70% ózin-ózi usynǵandar. Kandıdattardyń ortasha jasy 43 jasty qurady. Sonymen birge 662 myńnan astam partıa múshesi daýys berýge qatysty.