30 jeltoqsannan bastap Qazaqstanda aýyr jáne asa aýyr sybaılas jemqorlyq qylmystary úshin sottalǵandardy shartty túrde merziminen buryn bosatýǵa tyıym salynady. Qylmystyq jáne Qylmystyq-prosestik kodeksterdegi osy jáne basqa da ózgerister týraly sybaılas jemqorlyqqa qarsy is-qımyl departamenti bastyǵynyń orynbasary Aıdos MAMYT brıfıńte málimdedi. Bul týraly azh.kz saıty habarlady. 

Onyń aıtýynsha, eki jaǵdaıda ǵana tyıym qoldanylmaıdy. 1. Eger sottalǵan adam áleýmettik jaǵynan osal azamattardyń keıbir sanatyna jatatyn bolsa (kishkentaı balalary bar áıelder; kishkentaı balalaryn jalǵyz ózi tárbıeleıtin er adamdar; 58 jastan asqan áıelder, 63 jastan asqan erler; I jáne II toptaǵy múgedekter). 2. Eger sottalǵan adam yntymaqtastyq týraly prosesýaldyq kelisimniń barlyq shartyn oryndaǵan bolsa.

Biraq merzim aralyǵy uzartyldy, ol ótkennen keıin shartty túrde merziminen buryn bosatýǵa ótinish berýge quqyly.

–  Eger buryn joǵaryda atalǵan azamattar sanaty aýyr sybaılas jemqorlyq qylmysy úshin jazanyń úshten birin ótegen soń shartty túrde merziminen buryn bosatýǵa ótinish bere alatyn bolsa, endi olar jazanyń keminde jartysyn óteýi kerek bolady. Al asa aýyr sybaılas jemqorlyq qylmystary úshin sottalǵan adam shartty túrde merziminen buryn bosatýǵa ótinishti jazý úshin jazanyń keminde úshten eki bóligin óteýi kerek (buryn keminde jartysy bolǵan). Qoldanystaǵy sharalar kúshti aldyn-alý quralyna aınalatynyna senimdimin. Árbir memlekettik qyzmetshi endi aıaǵyn shalys baspas buryn, myń ret oılanatyn bolady, – dedi Mamyt

Ekinshi ózgeris – sottalýshylarda jemqorlyq qylmysy úshin jazany birden qonys kolonıasynda óteý múmkindigi bolmaıdy.

– Bul jalpy qylmys jasaǵany úshin sottalǵandarmen salystyrǵanda jemqor sheneýnikterdiń artyqshylyq jaǵdaıyn joıady. Qonys kolonıasyna aýysý úshin jabyq tıptegi túzeý mekemelerinde kem degende eki jyl ótkizý kerek. Bul aıyrmashylyq biraz syn týdyrdy.

Úshinshi ózgeris – quqyq qorǵaý organdarynyń qyzmetkerleri men sýdıalar úshin sybaılas jemqorlyq jazasy kúsheıtildi: olar úshin, mysaly, QR Qylmystyq kodeksiniń 366-baby («Para alý») boıynsha eń uzaq merzimder qoldanyldy.

Tórtinshi ózgeris – memlekettik qyzmetkerlerge, parlament depýtattaryna, sýdıalarǵa sheteldik bankterde esepshottar ustaýǵa tyıym salýdy engizý. Endi memlekettik qyzmetshilerdi laýazymǵa taǵaıyndaý kezinde olarǵa, eger bar bolsa, sheteldegi shottaryn jabýǵa 6 aı merzim beriledi. Al jumys istep júrgen memlekettik qyzmetshilerge keletin bolsaq, olarǵa da QR-dan tys jerlerde ornalasqan sheteldik bankterdegi esepshottardy jabýǵa 6 aı merzim beriledi.

Sonymen qatar, zańda memlekettik qyzmetshilerdiń sheteldik bankterde esepshottary bolýǵa quqyǵy bar jaǵdaılar anyqtalǵan – bul jumys, oqý, taǵylymdamadan ótý, shetelge issaparǵa shyǵý nemese emdelý nemese zańdy ókil retinde kámeletke tolmaǵan balanyń shetelde bolýy.

Eger memlekettik qyzmetshi sheteldik banktegi esepshotyn japqysy kelmese, onda ol óz erkimen jumystan ketý týraly ótinish berýi kerek.