Elimizdegi mektepterde, kolejder men ýnıversıtetterde debat qozǵalysyn qaıta jańǵyrtyp jatyrmyz. Bul týraly bilim jáne ǵylym mınıstri Asqat Aımaǵambetov facebook paraqshasynda jazdy.
– Debatqa alǵash ret kýrstasymnyń ótinishi boıynsha qatystym. Negizi oıynǵa basqa azamat shyǵýy kerek bolatyn, biraq ol bara almady. Osylaısha ekinshi kýrsta oqyp júrgenimde, debattarǵa qatysa bastadym. Ár oıyn saıyn tájirıbe jınap, jarty jyldan keıin fakúltet deńgeıinde, keıin ýnıversıtet, qala, oblys deńgeıinde jeńimpaz boldyq. Odan keıin ulttyq pikirsaıys týrnıri boldy. Sol jyldary debat qozǵalysy óte belsendi damyp jatty. Árbir ýnıversıtet pen mektep qabyrǵasynda debat klýbtary jumys isteıtin.
Mektepterde pikirsaıystar Karl Popper formatynda, al ýnıversıtetterde negizinen amerıkalyq parlamenttik formatta uıymdastyrylatyn. Oıynnyń qaı tilde ótkiziletinine baılanysty debat úsh lıgaǵa bólinetin.
Qazirgi ýaqytta jan-jaqty damý úshin tek bilim qory jetkiliksiz. Ár adam jınaǵan bilimi men biligin durys paıdalanýy mańyzdy. Bul rette debat oıyndary men mekteptegi ózin-ózi basqarý tetikteri joǵaryda atalǵan qabiletterdi qalyptastyrady. Debat tek zıatkerlik oıyn emes, ol – synı oılaý daǵdylaryn qalyptastyryp, aqparatty durys taldaýǵa, komandamen birlesip jumys isteýge, suraq qoıyp, olarǵa naqty jaýap berýge úıretetin bilim berý tehnologıasy. Oıynǵa qatysýshylar keıin úgit-nasıhat pen popýlısik ıdeıalardy ońaı ajyratyp, óz ustanymyn kópshilikke naqty argýmentter arqyly jetkize alady. Mundaı tájirıbe jastarǵa kúndelikti aqparat aǵynyn synı qabyldaýǵa da kómektesedi. Balalar bir-birimen qarym-qatynas jasaı otyryp, ózderiniń áleýmettik baılanystary men bir-birine degen senimin nyǵaıtady, – dep jazdy mınıstr.
Mınıstr debat oıyndary oqý ornyndaǵy bilim alýshylardyń jan-jaqty damýyna barynsha múmkindik jasaý qajet ekendigin jetkizdi.
– Biz elimizdegi mektepterde, kolejder men ýnıversıtetterde debat qozǵalysyn qaıta jańǵyrtyp jatyrmyz. Árbir oqý ornyndaǵy bilim alýshylardyń jan-jaqty damýyna barynsha múmkindik jasaý qajet. Bul rette mekteptegi ózin-ózi basqarý júıesiniń de yqpaly zor. Y. Altynsarın atyndaǵy ulttyq bilim akademıasy arnaıy ádistemelik nusqaýlyq ázirlep shyǵardy. Sonyń negizinde elimizdegi mektepter ózin-ózi basqarý tehnologıalaryn engize alady, – dedi Aımaǵambetov.
Mınıstr pikirsaıystar men ózin-ózi basqarý júıesi áleýmettik kapıtal men qoǵamdyq senim deńgeıin kóterýge de áser etetinin jetkizdi.
