Premer-mınıstrdiń orynbasary, ulttyq ekonomıka mınıstri Serik Jumanǵarın shegirtke taqyrybyna baılanysty jýrnalıserdiń birimen sóz talastyryp qaldy. Oqıǵa Úkimet kýlýarynda bolǵan.

Jýrnalıser mınıstrden 2023 jylǵy shegirtke qaptaǵan kezeńde aıtqan pikirin naqtylaýdy surady. Sol kezde Jumanǵarın keıbir elderde shegirtke taǵam retinde paıdalanylatynyn aıtyp, ony «halal ónim» dep ataǵan bolatyn.

Jýrnalıserdiń biri:
– Qazaqstanda shegirtkeden chıpsy qashan shyǵarylady? – dep suraǵanda, birneshe mınýtqa sozylǵan pikir almasý bastaldy.

Serik Jumanǵarın bul pikirin burmalap jetkizgenderge narazylyǵyn bildirip, bylaı dedi:

– Men eshqashan shegirtkeden chıpsy jasaıyq dep aıtqan joqpyn. Jáne ony jeý kerek dep úgittemedim. Neni oıdan shyǵaryp otyrsyzdar? Men tek shegirtkeniń keıbir elderde taǵam retinde qoldanylatynyn jáne halal ónim ekenin aıttym. Bul jaıynda Qazaqstan musylmandary dinı basqarmasy da málimdegen. Biraq ony jeý kerek dep aıtqanym joq. Jeımin deseńder – óz erikteriń.

Aıta keteıik, byltyr maýsym aıynda Májilis kýlýarynda bergen suhbatynda Jumanǵarın shegirtkemen kúres taqyrybynda pikir bildirip, «shegirtke – halal ónim» degen bolatyn. Bul málimdeme sol kezde áleýmettik jelide qyzý talqy týdyrǵan edi.