Sherzat Polattyń ólimine baılanysty ótip jatqan atyshýly qylmystyq is boıynsha sot otyrysynda sottalýshy Shyńǵys Belǵojaev jaryssóz kezeńinde óz ustanymyn ashyq bildirip, Qarjaýbaı Nurymovty jaýapqa tartýdy surady. Ol qaıǵyly oqıǵa jaıly oı tolǵaı kele, ómir men ólim jaıly fılosofıalyq pikirin de jasyrmady.

– Bul ómirde eshkim máńgi emes. Barlyǵymyzdyń baratyn jerimiz – bir. Ajaly kelgen adam erte me, kesh pe – báribir, dál ýaqytynda dúnıeden ótedi. Osy qaıǵyly oqıǵaǵa biz sebepker bolyp otyrmyz, – dedi ol.

Sottalýshy óz sózinde bul iske qatysy bar adamdardyń barlyǵy birdeı jaýapkershilikke tartylmaǵanyn meńzedi. Onyń aıtýynsha, keıbir tulǵalar bul proseske negizsiz tartylyp otyrsa, keıbireýler múlde eskerýsiz qalǵan.

– Dýman Ysqaq búgin ortamyzda sebepsiz otyr. Al Darhan Áskentaıdy men múlde tanymaı kettim. Qarjaýbaı Nurymov bul iste jaýap berýi tıis dep esepteımin, – dedi Belǵojaev sot aldynda.

Sonymen qatar sot otyrysynda jábirlenýshi tarap talap etip otyrǵan 660 mıllıon teńge kólemindegi moraldyq ótemaqy týraly da pikir aıtyldy. Belǵojaev bul somany tym asyra siltegen talap dep baǵalady.

– Bul somany osy otyrǵan 9 adam ómir boıy jumys istese de óteı almaıdy. Sondyqtan ótemaqy talabyn qanaǵattandyrmaýdy suraımyn, – dedi ol.

Aıyptaýlar jáne is mán-jaıy

Belǵojaev pen ózge de aıyptalýshylarǵa Qazaqstan Respýblıkasynyń Qylmystyq kodeksiniń birneshe baptary boıynsha aıyp taǵylǵan. Olardyń qatarynda:

• 99-bap – kisi óltirý,

• 188-bap – urlyq,

• 293-bap – buzaqylyq,

• 434-bap – qylmysty jasyrý.

Sot-medısınalyq saraptama qorytyndysy boıynsha, Sherzat Polat pyshaq jaraqaty saldarynan qan joǵaltyp, oqıǵa ornynda kóz jumǵan. Bul jaǵdaı qoǵamda keń rezonans týdyryp, kópshiliktiń nazaryn aýdarǵan edi.

İs boıynsha úkim áli shyqpaǵan, sot prosesi jalǵasyp jatyr.