Qazaqstandyq taýar óndirýshilerdiń biryńǵaı tizilimi qurylmaq
2025 jylǵy 3 mamyrda ótken Úkimet otyrysynda QR Indýstrıa jáne qurylys mınıstri Ersaıyn Naǵaspaev otandyq taýar óndirýshilerdi qoldaý sharalaryn tanystyryp, qazaqstandyq taýar óndirýshilerdiń biryńǵaı tizilimi qurylatynyn málimdedi.
Mınıstrdiń aıtýynsha, bul bastama — bıylǵy zańnamalyq jańalyqtardyń biri. Jańa júıe otandyq óndirýshiler men olardyń ónimderi týraly aqparatty qamtıtyn memlekettik sıfrlyq baza bolmaq.
"Tizilimdi engizý arqyly jınaqtalǵan málimetter negizinde jalǵan óndirýshilerdi anyqtap, ashyqtyqty arttyryp, sybaılas jemqorlyqty azaıtýǵa jol ashylady", — dedi mınıstr Ersaıyn Naǵaspaev.
Tizilimge engizý tórt kezeńmen júzege asady:
-
Ótinim berý – aqparattyq júıe arqyly tapsyrylady, al derekterdi óńdeýge ruqsat elektrondyq sıfrlyq qoltańba (ESQ) arqyly rastalady;
-
Málimetterdi tekserý – memlekettik derekqorlarmen avtomatty sáıkestendirý júrgiziledi;
-
Tehnologıalyq tekseris – óndiristik prosester men operasıalar baǵalanyp, qajet bolsa, kásiporyn alańynda tekserý júrgiziledi;
-
Turaqty monıtorıń – tizilimge engen óndirýshilerge toqsan saıyn baqylaý júrgiziledi.
Premer-mınıstr Oljas Bektenov tizilimge qosylý prosesi barynsha jeńil ári ashyq bolatynyn atap ótti:
"Adal óndirýshiler tizilimge avtomatty túrde enedi. Al jalǵan óndirýshilerge kirýge jol berilmeıdi. Ótinish berý – qarapaıym, eshqandaı artyq qujat pen tekseris talap etilmeıdi. Barlyq tekserý avtomattandyrylǵan, adamı faktor aralaspaıdy", – dedi Úkimet basshysy.
Jańa júıe qashan iske qosylady?
Taýar óndirýshilerdiń biryńǵaı tizilimi 2026 jylǵy 1 qańtardan bastap tolyq iske qosylady. Memlekettik jáne kvazımemlekettik sektorlardaǵy satyp alýlarda tek osy tizilimge engen otandyq óndirýshilerge basymdyq berilmek.
