Búgin Narxoz University jáne SANA Business Academy bastamasymen bıznes salasyndaǵy mamandar úshin qazaq tilindegi alǵash magıstr oqý baǵdarlamasy óz jumysyn bastady. Atalmysh baǵdarlama elimizde 30 jyl boıy orys tilinde ǵana ótetin, endi kásibı túrde bıznesti basqarýdy meńgerý úshin qazaqsha bilim alýǵa bolady. Akademıalyq kúntizbe boıynsha oqý 1 jyldy qamtıdy. Oqý josparyna sáıkes alǵashqy sabaq “Welcome day” tanystyrýynan keıin “İskerlik komýnıkasıa” pánimen jalǵasty. Barlyq pánder tolyq memlekettik tilde ótedi. Ýnıversıtet ákimshiligi bıznestegi básekege qabiletti jańa býyndy daıyndaý úshin tájirıbeli praktık mamandardy oqytýshylyq quramǵa jınady.
Maqsat Halyq «SANA» Business Academy dırektory:
MBA - bul bıznesti basqarýdyń magıstr dárejesi. Akademıalyq deńgeıde qarjy, ekonomıka salasynyń bakalavrdan keıingi satysy qazaq tilinde ótedi, alaıda bıznes salasy búginge deıin tek orys tilinde edi. Osy problemany sheshý úshin Narxoz university-men birigip jańa oqý baǵdarlamasyn qurdyq. Osyǵan deıin kásibı bıznes oqý baǵdarlamasyn basqa da ýnıversıtetterge engizdik, al bul bastama jańa dem desek bolady. «Basshylarǵa arnalǵan iskerlik basqarý» bilim berý baǵytyna túsý úshin kem degende 3 jyl kásip júrgizip, jeke tájirıbeńiz bolýǵa tıis. Sondaı-aq mindetti túrde bakalavrıat dıplomy qajet. Óz kásibin damytamyn degen tulǵalar úshin esigimiz ashyq.
EMBA oqý baǵdarlamasynda oqý júıesine saı 8 mindetti jáne 4 tańdaý pán ótedi. Oqý aıyna 3-4 ret modýldik formatta, jumys prosesin úzbeı júzege asady. Al ár topta 30 stýdentten bolady, ár salanyń bilgiri men kóregeni óz tájirıbesin ortaǵa salady. Stýdentter ár pándi tolyq meńgerý úshin jeke taqyrypqa toqtalyp, bıznes-keıs nemese arnaıy tapsyrma arqyly qorytyndy jasaıdy. Alǵan bilimdi jumys tájirıbesinde birden qoldanyp, jobalardy óz kásibimen tyǵyz baılanystyrýǵa múmkindik bar.
Aıatjan Ahmetjan ”QAZBILIM GROUP” kompanıasynyń basqarma tóraǵasy:
Men úshin atalmysh oqý baǵdarlamasy kásipti meńgerýge naǵyz nyq qadam der edim. Sebebi búginde trendke aınalǵan kásipti meńgerýge úshin ótetin aılyq kýrstar ilip alar dúnıe bermeıdi. Qysqa bilim berý baǵdarlamasynan jaqsy nátıje kórsetý múmkin emes dep oılaımyn. Jarq etip janǵan dúnıe, jarq etip sónetini anyq. Ózim bilim salasymen bıznesti qatar alyp júrgendikten aǵylshyn, qytaı tilindegi EMBA baǵdarlamaryna qyzyǵatynmyn. Al endi bul baǵyt ana tilimizde de ótetini meni qýantady. Kez kelgen isti kásibı turǵyda meńgergen men úshin durys. Beıkásibı tirlikten nátıje alý qıynnyń qıyny. Sondyqtan mendegi oı ár kásipker óz salasyn jetik meńgerse eken.
Qazaq tilindegi alǵashqy Executive MBA baǵdarlamasynyń bastalýy - elimizdiń bıznes salasyndaǵy mańyzdy jańalyq. Jańa oqý formaty strategıalyq kózqarasy myqty, ár sferaǵa ıkemdi jáne básekege qabiletti mamandardy daıarlaıdy dep senemiz. Bul baǵyt bolashaqta óz kásibin júıeli túrde damytqysy keletinder úshin senimdi irgetas bolmaq.
