Endi qazaqstandyqtar halyqqa qyzmet kórsetý ortalyǵynyń qyzmetkerin úıge shaqyrta alady. Bul týraly "Azamattarǵa arnalǵan úkimet" memlekettik korporasıasy" málimdedi. 

"Azamattar halyqqa qyzmet kórsetý ortalyǵynyń qyzmetkerin úıge shaqyrýǵa múmkindik beretin jańa servısti paıdalana alady. Belgilengen ýaqytta maman kórsetilgen mekenjaı boıynsha kelip, memlekettik qyzmetti kórsetedi. Servısti paıdalaný úshin Memlekettik korporasıanyń resmı saıtynda "jeke menedjerdi úıge shaqyrý" batyrmasyn basyp, qajetti málimetterdi toltyrý qajet. Sondaı-aq, ótinimderdi 1414 biryńǵaı baılanys ortalyǵy arqyly da berýge bolady. "Azamattarǵa arnalǵan úkimet" mamandary málimetterdi naqtylaý maqsatynda jáne menedjerdiń kelý ýaqytyn belgileý úshin qyzmet alýshymen baılanysatyn bolady" - delingen habarlamada.

HQKO-dan tys jerde menedjerler tólqujat, jeke kýálik, júrgizýshi kýáligin alý jáne kólik quraldaryn tirkeý jónindegi qyzmetterdi qospaǵanda memlekettik qyzmet túriniń kez kelgenin kórsete alady. Pılottyq joba elimizdiń barlyq óńirinde iske qosylǵan.