Elimizdiń bas merekesi – Respýblıka kúni qarsańynda Qoǵamdyq marapattar jónindegi Respýblıkalyq keńes pen «Ýaqyt Tańdaýy» Agenttiginiń birlesken jobasy boıynsha júrgizilgen baıqaýdyń qorytyndysy shyǵaryldy.
Jambyl atyndaǵy memlekettik akademıalyq fılarmonıasy – Jyldyń úzdik fılarmonıasy atalymynda bas júldege ıe boldy. Bastaýynda áıgili mýzykatanýshy, akademık Ahmet Jubanov turǵan bul konserttik-sahnalyq mádenı betkeustar mekemeniń qurylǵanyna bıyl 90 jyl tolyp otyr.
Fılarmonıa quramynda búginde N. Tilendıev atyndaǵy Akademıalyq fólklorly-etnografıalyq «Otyrar sazy» orkestri, B. Baıqadamov atyndaǵy Memlekettik hor kapelasy, T. Ábdirashev atyndaǵy QR Memlekettik akademıalyq sımfonıalyq orkestri, Qazaqstan Respýblıkasynyń Memlekettik úrmeli aspaptar orkestri, Memlekettik qaraǵaıly úrmeli aspaptar kvınteti, Ǵ. Jubanova atyndaǵy Memlekettik ishekti aspaptar kvarteti, Memlekettik klasıkalyq gıtarıster kvınteti sıaqty shyǵarmashylyq jeti ujym eńbek etedi. Fılarmonıa ujymy kórermenge jylyna 250-280 konsert usynady.
Dırektory –Aqan Jylqyshybaıuly Abdýalıev.
Polıgrafıa, baspa isi, kitap saýdasy boıynsha mamandanǵan «Atamura» korporasıasy – Jyldyń úzdik baspasy retinde jeńimpaz bolyp tanyldy. «Atamura» baspasy – oqýlyqtar men oqý-ádistemelik quraldar, ǵylymı, ǵylymı-kópshilik, kórkem-ádebı, ensıklopedıalyq basylymdar shyǵaratyn ámbebap baspa. Baspa avtorlardyń quqyǵyn ózderinde qaldyra otyryp qazaq jáne orys, basqa da shetel tilderinde jylyna jalpy kólemi 1000 baspa tabaqtan astam, taralymy 1,5 mln dana kitaptar men kitapshalar, 50 mln danadan astam túrli polıgrafıalyq ónimder shyǵarady. İs júzinde ulttyq ıdeologıamyzdy damytýǵa orasan úles qosyp otyr.
«Atamura kitaphanasy» serıasymen 2002 jyldan bastap búgingi kúnge deıin elimizge belgili 150-den astam aqyn-jazýshynyń týyndylary basylyp shyqty. Budan ózge ǵylymı ádebıetter basyp shyǵarý, «Atamura kitaphanasy», «Atamura» mektep kitaphanasy», «Meniń tuńǵysh kitapsham» sıaqty serıalarmen ónim shyǵarý jalǵasyp keledi. Sondaı-aq «Atamura» korporasıasy táýelsizdik jyldarynda jańa býyn oqýlyqtaryn shyǵarýǵa da óz úlesin qosty.
Birneshe ret baspa-polıgrafıa ónimderi boıynsha halyqaralyq júldelerge ıe boldy.
Korporasıada myńǵa tarta adam eńbek etedi.
Prezıdenti – Raqymǵalı Abraruly Qul-Muhammed.
Sarapshylardyń biraýyzdan uıǵarymy boıynsha «Bilim-ınnovasıa» halyqaralyq qoǵamdyq Qory – Jyldyń úzdik Qory dep tanyldy.
«Bilim-ınnovasıa» halyqaralyq qoǵamdyq qory (buryn KATEV qory) 1992 jyldan beri sapaly bilim, sanaly tárbıe baǵytynda jumys istep keledi. Qor qyzmeti «Bilim-ınnovasıa» lıseıleri men ózge de bilim berý uıymdarynyń bilim berý qyzmetin úılestirýge, osy uıymdardyń qyzmetine ádistemelik jáne uıymdastyrýshylyq basshylyqty júzege asyrýǵa, orta jáne joǵary bilim berý júıesin damytý maqsatynda basqa da memlekettik jáne jeke bilim berý uıymdarymen áriptestik jelisin damytýǵa baǵyttalady. Qor daryndy balalarǵa arnalǵan 32 lıseı men basqa da áriptes mekemelerdi biriktirip otyr. Qor jumys istep kele jatqan 33 jyldyń ishinde pán olımpıadalarynda BIL shákirtteri halyqaralyq deńgeıde 4558 medal, respýblıkalyq bilim saıystarynda 5147 medal jeńip alǵan.
Onyń ishinde 1017-si halyqaralyq altyn medal!
Prezıdenti – Óte Darhan Ermahanuly.
Qazaqstanda otyz jyldan astam ýaqyttan beri halal standartymen jumys istep kele jatqan «Ozyurt» meıramhanalary – Jyldyń úzdik qoǵamdyq tamaqtandyrý jelisi retinde jeńimpaz boldy. Ol Shyǵys pen Batys kýhnálaryna ózindik kópir bolyp otyr.
«Ozyurt» meıramhanalarynyń alǵashqysy Tólebaev kóshesi, 13 meken-jaıyndaǵy restoran. Ol tutynýshylarǵa túrik taǵamy «dónerdi» eń alǵashqy bolyp usyndy. 2012 jyly «Ozyurt food» brendimen «As úı fabrıkasy» quryldy. Búginde meıramhana jelisi almatylyqtar men qonaqtardyń joǵary baǵasyna ıe.
Búginde meıramhananyń Ozyurt Tulebayeva, Ozyurt Aport Moll, Ozyurt Atakent Moll, Ozyurt Ush Sunkar, Ozyurt Aport East, Ozyurt Khan Shatyr sıaqty fılıaldary jumys istep tur. Meıramhanalar jelisiniń basty ereksheligi – taǵamdarynyń dámdiligi men joǵary sapasy.
«Ozyurt» meıramhanalar jelisiniń dırektory – Hamza Arslan.
