Almaty oblysy İle aýdanynyń máslıhat depýtaty Nurlan Baıǵazıev Tarazda soqqyǵa jyǵylǵan oqıǵaǵa týraly aıtyp berdi.
2024 jylǵy 13 mamyr kúni Taraz qalasyndaǵy dámhanalardyń birinde Almaty oblysy İle aýdany máslıhatynyń depýtaty Nurlan Baıǵazıev aýyr soqqyǵa jyǵyldy. Bul aqparatty Jambyl oblystyq Polısıa departamenti rastady.
Oqıǵa týraly aqparat 14 mamyrda jarıalandy. Baıǵazıev bet jaraqatymen aýrýhanaǵa jetkizilgen, alaıda medısınalyq mekemede em alýdan bas tartqan.
Oqıǵanyń jaı-japsary
Tilshilermen sóılesken depýtat Nurlan Baıǵazıev jumys saparymen Tarazda júrgenin aıtty. Ol qaladaǵy dámhanalardyń birinde zańger retinde klıentterimen kezdesip otyrǵan. Sol sátte uıaly telefonynyń qýaty taýsylyp, qurylǵysyn qýattaý úshin janyndaǵy ústelge — otbasymen otyrǵan adamdardyń janyna qoıǵan.
"Sol kezde álgi er adam maǵan telefondy sol jerge qoıýǵa tyıym saldy. Aradaǵy kelispeýshilik janjalǵa ulasyp, ol meni uryp jiberdi. Men qulaǵan soń da soqqyny jalǵastyrdy. Bul jaǵdaı menimen otyrǵan Baýyrjannyń kóz aldynda boldy. Ol shabýyldaýshyny áreń toqtatty jáne polısıa shaqyrdy. Men esimnen tanyp qalyppyn. Keıin maǵan jerde jatqanymda da tepkenin aıtty", – dedi depýtat Baıǵazıev.
Depýtattyń aıtýynsha, janjal sáti onyń uıaly telefonynyń kamerasyna túsip qalǵan. Qazirgi ýaqytta bul vıdeo materıal quqyq qorǵaý organdaryna tapsyryldy ma — naqty málimet joq.
Jambyl oblystyq Polısıa departamenti qylmystyq is qozǵalǵany nemese kúdiktiniń kim ekeni jóninde ázirge resmı aqparat taratqan joq.
