Astana qalasynda ótken ımamdar forýmy aıasynda "Qudaıy asta ysyrapqa jol bermeý" atty qujat qabyldandy. Bul bastama – elimizdegi dinı dástúr men ulttyq qundylyqtardy úılestire otyryp, qarapaıymdylyqty nasıhattaý, qazirgi qoǵamda jıi baıqalatyn ysyrap pen áleýmettik básekelestiktiń aldyn alýǵa baǵyttalǵan mańyzdy qadam.

Qujatta qudaıy as berý rásimin sharıǵat talaptary men qazaq halqynyń dástúrimen úılestirip ótkizý, artyq shyǵynǵa jol bermeý, ysyrapshyldyqty boldyrmaý sekildi qaǵıdalar naqtylanǵan.

Forým aıasynda ımamdar qazaqstandyqtardy:

• Otbasy qundylyqtaryn saqtaýǵa, dinimiz ben dástúrimizge saı er men áıeldiń óz mindetterin atqarýyna jáne urpaq tárbıesine erekshe mán berýge;

• Qudaıy asty qarapaıym túrde, shynaıy yqylaspen ótkizýge, artyqshylyq pen sán-saltanatqa boı aldyrmaýǵa;

• Dástúrli ıslam qundylyqtaryn dáripteý arqyly ulttyq jáne rýhanı tutastyqty nyǵaıtý jolynda belsendi bolýǵa shaqyrdy.

Sondaı-aq forým barysynda "Qazaq halqynyń dástúrinde jáne Islam dininde otbasy qundylyǵy" atty tuǵyrnama da qabyldandy. Qujatta Islamdaǵy otbasynyń orny men jaýapkershiligi aıqyndalyp, ata-ana men bala arasyndaǵy baılanysty bekemdeý, ımandy, tárbıeli ári bilimdi urpaq qalyptastyrý – basty murat retinde belgilengen.