Atyraý oblysynyń burynǵy ákimi Bergeı Rysqalıevtiń uly Aslan Rysqalı Ulybrıtanıa astanasynda elıtalyq jyljymaıtyn múlikke ıelik etip otyrǵany anyqtaldy.

Ashyq derekterge súıensek, 2021 jyldyń sáýir aıynda Aslan Rysqalı Londonnyń Kennıngton Roýd 346-348 mekenjaıyndaǵy ǵımarattyń birinshi qabatynan páter satyp alǵan. Onyń quny sol kezde 1,51 mıllıon fýnt sterlıńti (shamamen 1 mıllıard teńge) quraǵan. Búginde bul múlik 1,88 mıllıon fýntqa, ıaǵnı 1,3 mıllıard teńgege baǵalanyp otyr.

Rysqalıevter otbasy sońǵy 12 jyldan beri Londonda turyp jatyr. Olar Ulybrıtanıadan saıası baspana alǵan. Al Qazaqstan tarapy Bergeı Rysqalıevti 2019 jyly syrttaı 17 jylǵa bas bostandyǵynan aıyrǵan. Ol uıymdasqan qylmystyq top qurdy, jemqorlyq pen búdjet qarajatyn asa iri kólemde jymqyrdy dep aıyptalǵan bolatyn. Onyń aǵasy Amanjan Rysqalıev 16 jylǵa sottalǵan.

Aıta ketý kerek, Rysqalıev 2006–2012 jyldar aralyǵynda Atyraý qalasy men oblysynyń ákimi qyzmetin atqardy. Qyzmetinen ketken soń onyń aty birqatar daýly istermen, jemqorlyqpen jáne aktıvterdi zańsyz ıelenýmen baılanysty atala bastady. Tergeý isi birneshe jylǵa sozyldy.

Bir qyzyǵy, 2020 jyly tárkilengen múliktiń bir bóligi Rysqalıevter otbasyna qaıtarylǵan. Alaıda bul sheshimge Bas prokýratýra narazylyq bildirip, kasasıalyq shaǵym túsirdi. Joǵarǵy sot aqyry prokýratýranyń ustanymyn qoldady.