AQSH prezıdenti Donald Tramp Aýǵanstan, Mánma, Chad, Kongo, Ekvatorlyq Gvıneıa, Erıtreıa, Gaıtı, Iran, Lıvıa, Somalı, Sýdan jáne Iemen azamattaryna elge kirýge tyıym salatyn jarlyqqa qol qoıdy. Aq úı málimetinshe, bul elder «tıimdi tekserý júrgize almaıdy jáne AQSH úshin joǵary qaýip tóndiredi» dep tanylǵan.

Sonymen qatar Togo, Túrikmenstan, Býrýndı, Kýba, Laos, Serra-Leone jáne Venesýela azamattaryna qatysty ishinara shekteýler engizildi. Bul elder de qaýip tóndiretin memleketter qataryna jatqyzyldy.

Jarlyqta keıbir erekshe jaǵdaılar qarastyrylǵan. Atap aıtqanda, ulttyq múddege saı tulǵalarǵa, AQSH-tyń turaqty zańdy turǵyndaryna, qoldanystaǵy vızasy bar azamattarǵa jáne birqatar vıza sanattaryna bul tyıym qoldanylmaıdy.

Donald Tramp alǵashqy prezıdenttik merziminde de osyndaı shekteýler engizgen bolatyn. Ol kezde tyıym toǵyz elge qatysty boldy: Kýba, Iran, Lıvıa, Soltústik Koreıa, Somalı, Sýdan, Sırıa, Venesýela jáne Iemen. Bul jarlyqty keıinirek prezıdent Djo Baıden qyzmetke kirisken soń joıǵan edi.

Sondaı-aq, Tramp ákimshiligi buǵan deıin Garvard ýnıversıtetine sheteldik stýdentterdi qabyldaýǵa tyıym salǵan. Qazirgi ýaqytta ýnıversıtet bul sheshimge qarsy sottasyp jatyr. Garvardqa oqýǵa túsken stýdentter arasynda qazaqstandyqtar da bar. Olar sot sheshimin kútýde.