Mindetti áleýmettik medısınalyq saqtandyrý qorynyń tóraǵasynyń orynbasary Ǵalymjan Ábilov 400 mıllıon teńgeden astam qarjyny jymqyrdy degen kúdikpen qamaýǵa alyndy.
Sybaılas jemqorlyqqa qarsy qyzmettiń málimetinshe, jymqyrý medısınalyq uıymnyń "Damumed" aqparattyq júıesine mindetti áleýmettik medısınalyq saqtandyrý sheńberinde Óskemen qalasynyń turǵyndaryna kórsetilgen qyzmetter týraly kórineý jalǵan málimetter engizý jolymen jasalǵan.
"İs júzinde medısınalyq qyzmetter kórsetilmedi, otyz myńnan astam "tirkeýler" anyqtaldy. Sonymen qatar, ol jeke medısınalyq mekemeniń kásipkerlik qyzmetine zańsyz qatysyp, Qordyń jymqyrǵan qarajatyn, onyń ishinde qymbat múlikti satyp alý arqyly zańdastyrdy degen kúdikke ilindi", – dedi sybaılas jemqorlyqqa qarsy qyzmet ókilderi.
Sottyń sanksıasymen kúdikti qamaýǵa alyndy. Tergeý jalǵasýda, sheneýniktiń basqa qylmystyq epızodtarǵa qatysy bar-joǵy tekseriledi.
Densaýlyq saqtaý júıesi sybaılas jemqorlyq táýekelderine eń osal bolyp qala beredi jáne qoǵamnyń erekshe nazarynda. Sońǵy úsh jylda bul salada 134 qylmystyq quqyq buzýshylyq tirkeldi, olar boıynsha 57 adam sottalǵan.
Eske salsaq, Medısınalyq saqtandyrý júıesin jetildirýge baǵyttalǵan túzetýlerdi talqylaý barysynda Májilis depýtaty Murat Ábenov Áleýmettik medısınalyq saqtandyrý qory qyzmetiniń ashyqtyǵyna kúmán keltirgenedi.
