8–9 maýsym kúnderi Bolgarıa Prezıdenti Rýmen Radev Qazaqstanǵa resmı saparmen keledi. Bul sapar Memleket basshysy Qasym-Jomart Toqaevtyń shaqyrýymen júzege asady.

Sapar barysynda qos el basshylary arasynda joǵary deńgeıdegi kelissózder ótedi. Kezdesýde saýda-ekonomıkalyq jáne ınvestısıalyq yntymaqtastyqty odan ári damytý joldary talqylanady. Eki el arasyndaǵy baılanystardyń jańa kezeńge aıaq basýy kútilip otyr.

Qazaqstan men Bolgarıa arasyndaǵy dıplomatıalyq qarym-qatynas sońǵy jyldary oń serpin alyp keledi. Ásirese, aýyl sharýashylyǵy, farmasevtıka, bilim berý, mádenıet jáne jańartylatyn energıa kózderi salalarynda yntymaqtastyqty tereńdetýge eki tarap ta múddeli.

Sapar aıasynda birqatar ekijaqty qujattarǵa qol qoıylyp, iskerlik baılanystardy nyǵaıtýǵa baǵyttalǵan sharalar ótkizý josparlanyp otyr. Bul Bolgarıa men Qazaqstan arasyndaǵy áriptestikti jańa deńgeıge kóterýge múmkindik beredi.

Eske salsaq, Bolgarıa – Qazaqstannyń Ortalyq jáne Shyǵys Eýropadaǵy mańyzdy seriktesteriniń biri. Osy sapar arqyly taraptar senimdi saıası dıalogty jalǵastyryp, ekonomıkalyq baılanystardy naqty jobalar arqyly nyǵaıtýdy kózdep otyr.