Belgili aqyn Oljas Súleımenov, Qazaqstannan shyqqan alǵashqy ǵaryshker Toqtar Áýbákirov, "Baıtaq Bolashaq" ekologıalyq alánsynyń prezıdenti Azamathan Ámirtaı men ózge de qoǵam qaıratkerleri partıa quratynyn habarlady. Soǵan oraı 2 naýryz kúni Nur-Sultan qalasynda otyrys ótpek. 

"Tirkelmegen "Baıtaq" halyqtyq-ekologıalyq partıasy partıany ádilet organdarynda tirkeý máselesi boıynsha kezekti márte uıymdastyrý komıtetiniń otyrysyn ótkizedi" delingen aqparattyq habarlamada.

Otyrysqa Súleımenov, Áýbákirov, Ámirtaıdan bólek, Irak Álekeev, Oraq Álıev, Vıktor Sapýlnık sekildi qoǵam ókilderi, úkimettik emes uıym jáne erikti ekologıalyq qozǵalystardyń ókilderi qatyspaq.

Uıymdastyrýshylar sońǵy 5 jyl boıy yntaly top ádilet organyna tirkeý máselesimen 9 ret júgingenin, barlyq talaptar saqtalǵanyna qaramastan, únemi tirkeýge bas tartyp kelgenin aıtady.

"Memleket basshysynyń 2020 jylǵy 11 qańtar kúngi parlamenttegi "memleket pen qoǵam qarym-qatynasyn tranformasıalaý qajettigi týyp otyr. Qoǵamdyq kelisimniń jańa formaty kerek. Qazaqstan saıası modernızasıa jolyn jalǵastyrady. Bul – meniń prınsıpti ustanymym" degen sózderinen keıin bizde partıamyzdy tirkeýge úmit paıda boldy" deıdi uıymdastyrý komıteti.

Derekkóz: KazTAG saıty