QR Qorǵanys mınıstrligi qorǵanys vedomstvosy basshysynyń «2024 jyly áskerı mindettilerdi áskerı jıyndarǵa shaqyrý týraly» buıryǵynyń jobasyn ázirledi.

Mınıstrliktiń habarlamasynda jıyn kezinde áskerı mindettilerdiń jumys orny men atqaratyn laýazymy saqtalatyny aıtylǵan. Olarǵa ortasha jalaqy, al jumyssyzdarǵa memleket esebinen eń tómengi jalaqy tólenedi. Áskerı mindettilerdi temirjol nemese avtomobıl kóligimen tasymaldaý, olardy tamaqpen qamtamasyz etý QR Qorǵanys mınıstrliginiń qarajaty esebinen jasalady.

Jıynǵa shaqyrylǵan barlyq áskerı mindettiler kazarmalyq jaǵdaıda bolady. Olardy bólimniń ornalasqan jerinen seıilge shyǵýyn rota komandırleri ishki qyzmet jarǵysynda belgilengen tártippen júrgizedi.

Áskerı tártip pen qoǵamdyq tártipti buzǵany, qylmys jasaǵany, sondaı-aq memleketke keltirgen materıaldyq zalaly úshin áskerı jıyndarǵa shaqyrylǵan áskerı mindettiler eldiń zańnamasyna sáıkes jaýapqa tartylady. Áskerı mindettilerdiń áskerı jıyndardan jaltarýy Ákimshilik quqyq buzýshylyq týraly kodekske sáıkes bes aılyq eseptik kórsetkish mólsherindegi aıyppul salýǵa ákep soǵatyny da eskertilgen.