«Áke – otbasynyń tiregi» atty forým aıasynda bastaýysh synyp oqýshylary men ákeleriniń qatysýymen konserttik baǵdarlama qoıyldy. Kishkene búldirshinder ákelerimen bı bılep, án shyrqady, qazaqy bolmysty sińire bilgen balalardyń dombyra shertýi kópti súısintti. Oqýshylardyń áke týraly bir úzik oıy jazylǵan hattary da kelgen qonaqtardyń aldynda oqylyp, formýǵa ózindik ún qosty.

 Mektep dırektory Nurmahanbetov Ǵabıdolla áke tárbıesiniń mańyzdylyǵy jóninde:

– Balanyń tárbıesinde ákeniń orny erekshe. Mektep oqýshylarynyń sapaly bilim men jaqsy tárbıe alýy ózekti másele. Al «bir ákeniń tárbıesin júz mektep bere almaıdy». Biz ustaz tarapynan qansha jerden bilim bersek te, sizderdiń berer úlgi ónegelerińizdiń orny asqaq. Sondyqtan mekteptiń tárbıe jumysynda, bilim júıesinde sizdermen birlesip kóptegen is atqaratynymyzǵa senemin, – dep erteńgi bolashaq urpaǵymyzdyń búgingi tárbıesi jaıynda oı qozǵady.

Shara barysynda otbasyndaǵy áke tárbıesiniń alatyn orny,onyń mańyzdylyǵy jóninde áńgime órbidi. Mekteptiń ákeler qaýymmen atalǵan taqyryp jaıynda Qazaqstan Respýblıkasy Parlamenti májilisiniń depýtaty Erlan Stambekov,"Báıdibek baba" qorynyń teń tóraǵasy Qanat Dinistanov, Qazaqstan Respýblıkasynyń eńbek sińirgen jattyqtyrýshysy Valerıı Vasılev óz oılaryn bólisti. Sportshy Valerıı Anatolevıch balaǵa tárbıesinde eskerý kerekti birneshe faktorlarǵa toqtaldy.

– Balaǵa eshqashan kúshpen, qatty daýys kóterý arqyly aqyl úıretpeý kerek. Aıtqan aqylyń darýy úshin neniń durys, neniń burys ekenin, jasaǵan isiniń kem-ketigin adamı jumsaq tilmen aıtý arqyly jetkizý kerek. Ulyma ǵana emes, sport úıirmesine kelgen balalarǵa da solaı qaraımyn. 14 shákirtim Álem chempıony atandy. Óz balam 32 medal aldy. Bunyń bári dısıplına men ákelik meıirimniń jemisi. Alaıda buǵan aqy suramaý kerek. Bala tek alýshy. Qartaıǵanda bir shynyaıaq sý bere me, bermeı me ol bir Qudaıdyń qolynda. Psıhologıalyq turǵyda olardy qaryz jasamaýymyz qajet, – dep ary qaraı ul men qyz balaǵa ákelik mindetterge mysal keltirdi. 

Qanat Dinistanov balanyń úlgerimine anasymen teń deńgeıde ákesi de jaýapty ekeni, mektep jumystaryna, jınalystaryna otbasy bolyp at salysý máselesin kóterdi:

 – Otbasyndaǵy er adamnyń róli tek aqsha tabý, qajettilikterin qamtamasý etýmen shektelmeıdi. Oısyz úılenip, muńsyz ajyrasý sıaqty indet osydan shyǵady. Shańyraqta mámile kóp bolýy tıis. Al biz kóbine birinshi synypqa bararda, sosyn bitirerde qaı baǵyttaǵy oqýdy tańdaıtynyn surap, úılener kezde bir aqylymyzdy aıtyp qoıamyz. Al abzalynda áke retinde balanyń ár kúninde keńesshi, aqylshy bolýǵa tıistimiz, – degendi alǵa tartty.

       Forým mektep pen otbasynyń ózara baılanysyn nyǵaıtýǵa baǵyttalyp, otbasynyń qarym-qatynasyndaǵy senimdilikti jáne syılastyqty qalyptastyrýǵa úles qosty. Bundaı sharalardyń mektep qabyrǵasynda ótýi kishkene búldirshinderdiń erlik rýhyn kóterip, balanyń oqý ordasyndaǵy ómirinde áke rólin bekite túsedi. Ákeniń beretin bilimi men aqyl, tárbıesin eshbir ustaz bere almaıdy.