Byltyr maýsymnan beri jazasyn Astanadaǵy №64 abaqtyda ótep jatqan ol "24 kúnnen beri nár tatpaı ashtyq jarıaladym", dedi búgingi sottaǵy jaryssózde. 

"Kúnde ıogamen aınalysamyn. Biz kúnde kitap oqımyz, sportpen aınalysamyz. 24 kún ashtyq jarıaladym. Biraq qajetti qujattarymdy aldym. Maqsatyma jettim", dep KTK telearnasy sottaǵy Arystanbek Muhamedıulynyń sózin keltiredi.

Ol isti qarap jatqan prokýrordyń aýystyrylǵanyn qalaıdy. Áńgime Astanadaǵy "Dıplomat" qonaqúıin reıderlik jolmen tartyp aldy degen aıypqa qatysty qylmystyq is týrasynda. İstiń basy-qasynda júrgen memlekettik aıyptaýshy ótken jumada ǵana buǵan deıin eks-mınıstrdi aıypty dep taýyp, 12 jylǵa qamaýdy suraǵan.

Muhamedıuly bul is bitkenimen, basqasynyń bastalatyna senimdi.

Eske salsaq, burynǵy mádenıet mınıstri buǵan deıin eki is boıynsha aıypty dep tanylǵan. Áýeli Ulttyq mýzeıdegi jemqorlyq deregi boıynsha 8 jyl arqalasa, keıin sol jazany jeńildetý úshin advokaty arqyly para berip, basy taǵy bálege qaldy. Sonymen alǵashyndaǵy segiz jyl jazasyna taǵy úsh jyl qosylyp, 11 jylǵa bir-aq ketti. Sot úshinshi is boıynsha da kináli dep tapqannyń ózinde, taǵy 12 jyl jaza qosylmaıdy. Zań boıynsha, aıyptalýshy kesilgen úsh jazanyń ishindegi eń aýyryn óteýge tıis.

"Men sizge taǵy suhbat berip jatyrmyn, taǵy is qozǵaıdy. Qozǵaı bersin, men qoryqpaımyn. Nege deseńiz, barlyǵynyń naqty bir faktisi joq. Eger fakti bolsa, para alyp jatqanymdy, basqa bireýmen kezdesip jatqanymdy kórsetýshi edi, "mine" dep", dedi sottalýshy Arystanbek Muhamedıuly