Qys tússe Astana qalasynda muz qalashyǵyn salý ádetke aınalǵan. Bıyl da sol dástúrden jańylmaı Astana ákimi Ádilbek Jaqsybekov Elordanyń tórt birdeı jerine muz qalashyǵyn salýda. Ákimniń jumysy áleýmettiń ıgiligi úshin jasalyp jatsa «bárekeldiden» basqa aıtpaımyz ǵoı. Alaıda, bar-joǵy 2-3 aıda sý bolyp erip ketetin muz qalashyǵyn salýǵa búdjettiń mıllıondaǵan qarjysyn jumsaý qanshalyqty qajet?

Astanadaǵy eń úlken muz qalashyǵy «Han Shatyr» saýda oıyn-saýyq ortalyǵynda salynyp jatyr. Atalǵan qalashyqty salý úshin ákimdik otandyq músinshilerden bólek qytaılyq mamandardyń kómegine júginip otyr. Qazirgi tańda qurylysshylar  kúndiz túni qalashyqty turǵyzyp jatyr. Óıtkeni jeltoqsannyń 1-i kúni elimizdiń bas shyrshasyn Memleket basshysy Nursultan Nazarbaevtyń ózi jaǵady. Ákimdik soǵan deıin muz qalashyǵyn salý týraly merdiger kompanıaǵa «qatań» tapsyrma bergen kórinedi.

Alaıda, ákimdiktiń tapysyrmasyn merdiger kompanıanyń basshylary oryndaı almaıtyn sıaqty. Óıtkeni, birneshe kúnnen beri Astanada aýa-raıy 0 gradýstan joǵary bolyp tur. Al kúnniń kúrt jylynýy óz kezeginde qalashyqty salýǵa kedergi keltirýde. Degenmen muz qalashyǵyna jaýapty kompanıa basshysy Mádı Qanapın «3-4 kúnniń ishinde bul jumystardy bitiremiz» dep ýáde berýde. Sebebi ol qurylys jumystary 24 saǵat boıy júrgizilip jatqanyn alǵa tartyp otyr.

Muz qalashyǵynyń ýaqytynda beriletini nemese berilmeıtini biz úshin asa mańyzdy emes. Biz úshin eń mańyzdysy mıllıondaǵan qarjysynyń nebári eki-úsh aıda sý bolyp erip ketetindigi bolyp otyr. Óıtkeni muz qalashyǵyna jumsalǵan mıllıondar búdjettiń qarjysynan jumsalyp jatqany jasyryn emes. Alaıda, ákimdik atalǵan qalashyqty salýǵa qansha qarjy jumsaǵanyn aıtpaı otyr.  Al shyn mánisinde ákimdik ashyqtyq tanytyp, bul jumystarǵa qansha aqsha jumsaǵanyn aıtýy kerek edi. Bir bir.

Ekinshiden, basshylar jyl sońynda qarjy ıgerý úshin ártúrli quıtyrqylyqqa baratyny búginde eshkimge jasyryn bolmaı qaldy. Bizdiń paıymdaýymyzsha ákimdiktiń bul áreketi ıgerilmegen mıllıondardy tez arada ıgerýge baǵyttalyp otyrǵan sıaqty. Áıtpese ákimdik qatań tapsyrmany muz qalashyǵyn salyp jatqandarǵa emes, memlekettik baǵdarlama boıynsha páter salyp jatqan merdigerlerge bermeı me? Óıtkeni atalǵan baǵdarlama boıynsha bıyl berilýi tıis páterler kelesi jyldarǵa qalyp qoıýy jıi kezdesedi. Bir qyzyǵy ákimdik olardyń jumysyna júrdim-bardym qarap, al muz qalashyǵynyń tez aıaqtalýyna múddeli bolyp otyr.

Úshinshiden, buǵan deıin «Nur Otan» partıasy Tóraǵasynyń birinshi orynbasary Asqar Myrzahmetov «Táýelsizdik kúni ótpeı jańa jylǵa daıyndyq jumystary júrgizilmesin» dep usynys tastaǵan bolatyn. Osy arqyly ol Ońtústik Qazaqstan oblysynda ózi bastaǵan ıgi istiń elimizge keń taralýyn qalaǵan edi. Bir qýantarlyǵy atalǵan bastamany elimizdiń birneshe oblystarynyń ákimderi qoldaıtynyn aıtyp hat jazdy. Alaıda Asqar Isabekulynyń bastamasyna Ádilbek Jaqsybekov qarsylyq tanytyp jatyr. Qarsylyq demeı nemene qazirden bastap ol Astanaǵa shyrsha tigip, muz qalashyǵyn salýǵa qulshynyp ketti. Osy rette Ádilbek Jaqsybekov bas partıanyń múshesi retinde partıa basshysynyń bastamasyn nege qodamady degen zańdy suraq týyndaıdy? Sonda Astana qalasynyń ákimi «Nur Otan» partıasynyń saıasatyna qarsy ma?

Asqar Myrzametovty aıtpaǵannyń ózinde tipti ol Nursultan Nazarbaevtyń saıasatyna qarsy sıaqty. Óıtkeni prezıdent birneshe ret Qazaq eli óte qıyn daǵdarys kezeńinde ómir súrip jatqanyn, sondyqtan da únemshildik qajet ekenin aıtty. Al Ádilbek Ryskeldiuly bolsa halyqtyń salyǵynan jınalǵan qyrýar qarjyny jelge ushyryp, eki-úsh aıda erip ketetin muz qalashyǵyn salyp jatyr.  Sonda Nursultan Nazarbaevtyń únemshildik saıasatyna Astana qalasynyń ákimi Ádilbek Jaqsybekov qarsy ma?

Esterińizde bolsa, ol buǵan deıin quny 10 mıllıon teńge turatyn jyly aıaldamalar salyp aıdy aspanǵa shyǵarǵan bolatyn. Al dál sondaı aıaldamalardy Reseıde eń kóp degende 10 myń AQSH dollarǵa paıdalanýǵa bergen eken. Demek, Astana ákimdigi bir aıaldama 30 myń AQSH dollaryn jumsasa, reseılik gýbernatorlar atalǵan qarjyǵa úsh aıaldama salǵan. Bul arada «barmaq basty kóz qysty» áreket joq dep endi qalaı aıta alamyz? Sol sıaqty muz qalashyǵyn salýda da «áttegen-aılar» oryn alyp jatqan shyǵar. Jalpy, bul aıtyp otyrǵanymyz áshirne siz ben bizge belgili bolǵan jaǵdaılar ǵana. Al, kópshilikten tasada qansha qarjy negizsiz jumsalyp jatyr? Ony eshkim bilmeıdi. Óıtkeni bizdiń elde ǵana búdjetten jumsalǵan muz qalashyna qansha qarjy jumsalǵanyn bile almaısyń.

Serik JOLDASBAI

Astana